Onyń atynda jeke múlik bolmaýy tıis.
Ataýly áleýmettik kómek alyp júrgen qazaqstandyqtardyń bankrottyq jarıalaýyna bolady. Bul týraly Qarjy vıse-mınıstri Erjan Birjanov málim etti, dep habarlaıdy Almaty-akshamy.kz QazAqparatqa silteme jasap.
«Ataýly áleýmettik kómekti 6 aı boıy alǵan azamat ózin bankrot dep jarıalaı alady. Zań jobasyn ázirleý barysynda jumys toby men depýtattar osyndaı usynys jasady. Ataýly áleýmettik kómek alatyn azamat ózin bankrot dep jarıalaǵysy kelse, onyń atynda jeke múlik bolmaýy tıis. Sonymen qatar, bankke bereshegi bolsa, esep aıyrysý rásimin júrgizýi qajet», - dedi Erjan Birjanov Senatta ótken azamattardyń tólem qabilettiligi jáne bankrottyǵy týraly zań jobasyn talqylaýǵa arnalǵan jıyn barysynda.
Onyń aıtýynsha, sottan tys bankrottyq tek bankter, mıkroqarjy uıymdary men kolektorlyq agenttikter aldyndaǵy bereshegi boıynsha júrgiziledi.
Buǵan deıin Erjan Birjanov elimizde nesıe jáne basqa da qaryzyn tólemeı júrgen 7 mln boryshker baryn málim etti.
Sonymen qatar, jıyn barysynda alıment keshiriletin qaryzdar qataryna jatpaıtyny aıtyldy.
Al, bankrot bolyp tanylǵan azamattarǵa 5 jylǵa deıin nesıe berilmeıdi.