Astana qalasyndaǵy Qoshke Kemeńgeruly atyndaǵy №49 mektep-gımnazıasynyń 10 "A" synyp oqýshysy Qýandyq Amırhan erekshe jobasyn tanystyrdy, dep habarlaıdy aqshamnews.kz elorda ákimdiginiń resmı saıtyna silteme jasap.
Elordalyq oqýshy kórý qabileti nashar jáne múlde kórmeıtin jandarǵa arnalǵan aqyldy kózildirik oılap tapqan.
Jas ónertapqyshtyń bul jobasy kózi nashar kóretin adamdarǵa kúndelikti ómirde kóshede erkin qozǵalyp, túrli kedergilerden saqtanýǵa múmkindik beredi.
Aqyldy kózildiriktiń basty ereksheligi – adamnyń aldynda bir metr qashyqtyqtan bastap kedergi paıda bolǵanda, aldyn ala qazaq tilinde "Saqtanyńyz, aldyńyzda kedergi!" degen daýystyq eskertý jasaıdy.
Qýandyq Amırhan bul kózildirikti zaǵıp jandardyń qaýipsizdigin qamtamasyz etý maqsatynda qurastyrǵanyn aıtady. Aldaǵy ýaqytta ol jumystyń aýqymyn keńeıtip, basqa da nusqamalardy engizýdi kózdep otyr.