20 qyrkúıekte Astana qalasyndaǵy Saraıshyq aýdanynda Jumysshy mamandyqtar jyly aıasynda jańa skver – Jumysshy mamandyqtar aleıasy ashyldy. Bul alań eńbek adamdaryna degen qurmettiń, sondaı-aq jumysshy kásipterdiń el damýyna qosqan úlesiniń sımvolyna aınaldy.
Saltanatty is-sharaǵa qala turǵyndary, túrli sala mamandary, qoǵam belsendileri men depýtattar qatysty. Saraıshyq aýdany ákimi Maqsat Samatulynyń aıtýynsha, bul bastama Memleket basshysynyń 2025 jyldy Jumysshy mamandyqtar jyly dep jarıalaýyna oraı júzege asyrylǵan.
Merekelik sharanyń jarqyn sátteriniń biri – arnaıy mýraldyń ashylýy boldy. Onda túrli jumysshy mamandyq ıeleri beınelengen.Skverdi abattandyrý jumystary 3 aı boıy júrgizilip, ashylý kúni tolyq aıaqtaldy. Jobalaý barysynda aýdan turǵyndarynyń usynystary eskerilip, aleıa jergilikti halyqpen birlese otyryp jasaqtaldy.
Shara barysynda 400-den astam qylqan japyraqty aǵash otyrǵyzyldy.
– Jergilikti turǵyndar dál osy jerde skver bolsa eken dep tiledi. Biz sol armandy iske asyrdyq. Endi bul oryn qala turǵyndarynyń súıikti demalys ornyna aınalatynyna senemin, – dedi Maqsat Samatuly.
Aleıa – eńbekke qurmettiń belgisi, jumysshy kásipterdi dáripteıtin mádenı jáne áleýmettik is-sharalar ótetin alań bolady. Sonymen qatar, shara barysynda «Eńbek joly» baıqaýynyń jeńimpazdary da marapattalyp, eńbek salasynyń úzdikteri laıyqty baǵasyn aldy.