Astanalyq ujym ózderiniń úzdik týyndylary men áıgili qoıylymdaryn kórsetedi
27-30 qazanda «Astana Balet» teatrynyń Dýbaıǵa gastroli ótedi, dep habarlaıdy Almaty-akshamy.kz. Astanalyq ujym Shyǵystyń kórkin asha túsken eki kólemdi qoıylym – kópshilikke tanys «Mahabbat týraly ańyz» spektakli men «Beıbarys sultan» baletin usynbaq.
«Astana Balet» gastról shymyldyǵyn zamanymyzdyń zańǵar horeografy Iýrıı Grıgorovıchtyń Arıf Melıkov mýzykasyna qoıylǵan «Mahabbat týraly ańyz» spektaklimen ashady. Spektákl elý jyldan astam ýaqyt buryn shyǵarylǵanymen, sújet jelisi, aýqymdy dekorasıalary men kórkemdik bıigimen áli de kórermen qaýymdy tamsandyryp keledi. Munda qushtarlyq pen alǵashqy balǵyn sezim, mahabbat pen borysh sezimi arasyndaǵy kúres sýretteledi. «Mahabbat týraly ańyz» - ásem horeografıa men ǵajaıyp dekorasıalar, áýezdi áýen men kóne parsy ańyzy úılesim tapqan týyndy.
Gastróldik sapardyń ózge kúnderi teatrdyń bas baletmeısteri, Qazaqstannyń eńbek sińirgen qaıratkeri Mýkaram Avahrı qoıǵan «Beıbarys sultan» spektakli kórsetilmekshi. Mýzyka avtorlary – qazaqstandyq kompozıtorlar Hamıt Shańǵalıev pen Álıbek Álpıev. Tarıhı taqyryptaǵy balet qoıylymy týraly ıdeıany «Balet pen ulttyq bıdi qoldaý jáne damytý qory», Bas seriktesi «Samuryq-Qazyna» AQ birlese otyryp, júzege asyrdy.
Balet barysynda kórermen qaýym ótken zamanǵa shomyp, Beıbarys sultannyń ǵajaıyp ómirine qanyq bolady. Spektákl mazmunyn oılastyrǵan kezde, horeograf adam balasynyń jan syryna boılap, áıgili «jeńis atasy», HIII ǵasyrdaǵy Taıaý Shyǵystaǵy eń myqty memlekettiń ámirshisine aınalǵan qolbasshyny qandaı máseleler mazalaǵany jaıly oı órbitkendi qup kórdi. Bılik shyńyna jetkizgen osyndaı ómir belesteri sóz joq, uly maqsat úshin áldeneni qurban etýge májbúr etedi. Qıyn taǵdyryna qaramastan, Beıbarys sultan óziniń týǵan jeri – qypshaq dalasyna degen ińkár sezimin jadynda saqtap, kóńiline medeý etti. Dala samaly, shyǵys áýeziniń saryny men aıqas sahnalarynyń rýhty áýenderi kórermen qaýymdy sahnadaǵy qoıylymnan kóz almaı, túrli kúı keship, alaı-dúleı sezimge bóleıdi. Bul qoıylymda sújet ıirimderi, áýezdi áýen men túrli sezim qatparlary úılesim tapqan.
İs-shara Táýelsizdiktiń 30 jyldyǵy aıasynda, Mádenıet jáne sport mınıstrliginiń qoldaýymen ótedi.