Bıylǵy on aıdyń qorytyndysy boıynsha JİÓ ósimi 3,5%-ǵa deıin jedeldedi
QR Premer-Mınıstri Asqar Mamın «Astana» halyqaralyq qarjy ortalyǵynyń alańynda iri sheteldik ınvestorlar – «Blackrock», «Capital Group», «Aberdeen Asset Management», «Sands Capital», «Luxor Capital» jáne «Lugard Road Capital» ókilderimen kezdesti, dep habarlaıdy Almaty-akshamy.kz Úkimet basshysynyń resmı saıtyna silteme jasap.
Qazaqstannyń ınvestısıalyq múmkindikteri jáne el men aımaqta shetel kapıtalynyń bolýyn keńeıtý perspektıvalary talqylandy. «Astana» halyqaralyq qarjy ortalyǵynyń óńirge qajetti biregeı ınfraqurylymyna erekshe nazar aýdaryldy.
Úkimet basshysy ekonomıkanyń senimdi qalpyna kelý serpini aıasynda Qazaqstannyń ınvestısıalyq tartymdylyǵynyń artyp kele jatqanyn atap ótti. Bıylǵy on aıdyń qorytyndysy boıynsha JİÓ ósimi 3,5%-ǵa deıin jedeldedi. Qalpyna kelýdiń neǵurlym joǵary qarqynyna qurylysta (+7,6%), óńdeý ónerkásibinde (+5,3%) jáne qyzmet kórsetý salasynda (+3,4%) qol jetkizildi. Ekonomıkanyń belsendi qalpyna kelýi aıasynda tikeleı sheteldik ınvestısıalar aǵynynyń ósýi baıqalady. Máselen, 2021 jyldyń İ jartyjyldyǵynyń qorytyndysy boıynsha QR ekonomıkasyna salynǵan TSHI kólemi 30,4%-ǵa ulǵaıdy jáne $11,1 mlrd qurady. Bıylǵy jyldyń 10 aıynda qarjy sektoryna salynǵan ınvestısıalar kólemi 12,1%-ǵa ósti. Sheteldik kompanıalardyń ókilderi sheteldik ınvestorlar úshin jaǵymdy sıgnaldardyń biri 2020 jyly London qor bırjasy (LSE) men AİX-tegi Kaspi.kz tabysty IPO-sy bolǵanyn atap ótti. Bul rette, ózekti jahandyq trendterdi eskere otyryp, sheteldik kapıtaldyń ESG-qaǵıdattaryn engizýge jáne dekarbonızasıalaýǵa baǵdarlanǵany erekshe atap ótildi.
Sondaı-aq QR memlekettik aktıvterin jekeshelendirý baǵdarlamasyn iske asyrý perspektıvalary qaraldy. Kezdesýge Eýropanyń damýshy naryqtary bóliminiń jetekshisi jáne «Blackrock» kompanıasynyń aǵa portfeldik menedjeri Krıs Kolýnga, «Capital Group» kompanıasynyń aǵa portfeldik menedjeri Artýr Keı, «Aberdeen Asset Management» kompanıasynyń jetekshi portfeldik menedjeri Adam Montanaro, «Sands Capital» kompanıasynyń portfeldik menedjeri Tıdja Boıe, «Luxor Capital» kompanıasynyń prezıdenti Dýglas Snaıder jáne «Lugard Road Capital» kompanıasynyń basqarýshy seriktesi Dýglas Frıdman qatysty. Qazaqstan tarapynan kelissózderge Strategıalyq josparlaý jáne reformalar agenttiginiń tóraǵasy – AHQO basqarýshysy Qaırat Kelimbetov, energetıka mınıstri Maǵzum Myrzaǵalıev, sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın, «Samuryq-Qazyna» AQ basqarma tóraǵasy Almasadam Sátqalıev jáne t. b. qatysty.