Armıany polıgondyq jabdyqtarmen jáne trenajerlarmen jaraqtandyrý jalǵasyn tabýda
Almatyda Qurlyq áskerleri áskerı ınstıtýtynda qorǵanys vedomstvosynyń basshysy general-polkovnık Rýslan Jaqsylyqovtyń basshylyǵymen Qorǵanys mınıstrliginiń kóshpeli alqasy ótti, dep habarlaıdy Almaty-akshamy.kz.
Onda el Prezıdenti – Qarýly kúshterdiń Joǵarǵy Bas qolbasshysy Qasym-Jomart Toqaevtyń sáýir aıyndaǵy Úkimettiń keńeıtilgen keńesi men búkilarmıalyq forýmda bergen tapsyrmalary aıasynda basqarý organdary men áskerler qyzmetiniń ózekti máseleleri talqylandy.
Alqaǵa Qorǵanys mınıstriniń orynbasarlary, Qarýly kúshter túrleriniń bas qolbasshylary, óńirlik qolbasshylyqtar áskerleri men ásker tekteriniń qolbasshylary, quramalar men áskerı bólimderdiń komandırleri qatysty.
– Álemdegi áskerı-saıası ahýaldyń damýy eldiń áskerı qaýipsizdigin qamtamasyz etý jónindegi sharalardy túzetýdi talap etedi, – dep atap ótti general-polkovnık Rýslan Jaqsylyqov.
Ol ulttyq qaýipsizdikke, syrtqy saıasat tujyrymdamasyna, Qarýly kúshterdiń qurylysy men damýyna qatysty qujattarǵa tıisti ózgerister engizilip jatqanyn atap ótti.
Qazaqstannyń halyqaralyq arenadaǵy bedelin arttyrý maqsatymen áskerı baqylaýshylar men shtab ofıserleri retinde BUU-nyń bitimgerlik mısıalaryna qatysý úshin jeke quramdy daıarlaý jalǵasyp jatyr.
Áskerı qaýipsizdikti qamtamasyz etýge jáne eldiń qorǵanys qabiletin kúsheıtýge baǵyttalǵan sharalar kesheni iske asyrylýda. Jaýyngerlik daıarlyqtyń qarqyndylyǵyn arttyrý úshin jarty jyldyq oqytý sıkli engizildi. Armıany polıgondyq jabdyqtarmen jáne trenajerlarmen jaraqtandyrý jalǵasyn tabýda.
Tehnıka men oq-dáriler josparly túrde satyp alynýda. Qarý-jaraq pen tehnıkany kúrdeli jóndeý, jańǵyrtý júzege asyrylyp jatyr. Áskerı ınfraqurylymdy damytý jáne qalpyna keltirý jumystary jalǵasýda.
Qorǵanys mınıstriniń orynbasary – Bas shtab bastyǵy general-leıtenant Marat Qusaıynov óz baıandamasynda qazirgi zamanǵy qarýly qaqtyǵystardyń sıpatyna, áskerlerdiń jaýyngerlik jáne jumyldyrý daıyndyǵy máselelerine toqtaldy. Ol Qarýly kúshterdi damytý jónindegi is-sharalardyń josparly oryndalyp jatqanyn atap ótti.
Qazirgi zamanǵy qarýly qaqtyǵystar kezinde joǵary dáldiktegi qashyqtyqtan zaqymdaý quraldaryn, oq-dáriler men ushqyshsyz avıasıaǵa tosqaýyl qoıýdy belsendi qoldaný baıqalady. Qarsylastar kóbine energetıkalyq jáne kóliktik ınfraqurylym nysandaryna, qorǵanys-ónerkásip kásiporyndaryna, oq-dári qoımalaryna jáne munaı qoımalaryna zıan keltirýge tyrysady.
– Áskerler daǵdarystyq jaǵdaıda is-áreket etýge únemi daıyn bolýy kerek. Serjanttar quramyn daıyndaýǵa erekshe nazar aýdarý qajet, – dep atap ótti Bas shtab bastyǵy.