Qazaqstanda ónerkásiptik maqsatta ósirýge ruqsat etilgen qarasora sorttarynyń tizimi bekitildi, - dep habarlaıdy Aqshamnews.kz tilshisi.
Qazaqstan ónerkásiptik maqsatta qarasora ósirýge resmı túrde ruqsat berdi. Úkimet quramynda tetragıdrokannabınol (THC) mólsheri az, ıaǵnı esirtkilik áseri joq qarasora sorttarynyń tizimin bekitti. Bul zańǵa 30 maýsymda memleket basshysy qol qoıǵan edi.
Aýyl sharýashylyǵy mınıstrliginiń málimetinshe, ónerkásiptik qarasora tek zańda kórsetilgen 218 sort boıynsha ósiriledi. Úkimet qaýlysy 22 qyrkúıekte jarıalandy jáne jarıalanǵan kúnnen keıin 10 kún ishinde kúshine enedi.
"Esirtki jáne psıhotroptyq zattardy óndirýmen baılanysty emes ónerkásiptik maqsatta ósirýge ruqsat etilgen qarasora (kannabıs) sorttary bekitilsin", - delingen qaýly mátininde.
20 eldiń sorttary engizildi
Ruqsat etilgen qarasora sorttary álemniń 20 elinen ákelingen:
-
Eýropa: Germanıa, Italıa, Fransıa, Polsha, Vengrıa, Latvıa, Slovakıa, Chehıa, Estonıa, Ýkraına, Rýmynıa, Fınlándıa
-
Azıa: Qytaı, Japonıa
-
Soltústik Amerıka: AQSH, Kanada
-
Latyn Amerıkasy: Meksıka
-
Okeanıa: Aýstralıa, Jańa Zelandıa
-
Reseı
Resmı tizimde ónerkásiptik qoldanýǵa arnalǵan sorttardyń arasynda erekshe ataýlar kezdesedi: «Mama Marıa», «Djýdı», «Djoı», «Marına», «Vıktorıa», «Anjelo», «Endjı», «Armanka», sondaı-aq «Omegadar-1», «Sırıýs», «Vega», «Zorána», «Holodnyı Han», «Samosvet Bandı», «Tıgra» sıaqty sorttar bar.
Eske salaıyq, buǵan deıin İshki ister mınıstrligi Soltústik Qazaqstan oblysynda qarasora ósirýge tórt lısenzıa berilgenin habarlaǵan bolatyn.