Bul týraly Aıbar Oljaev FB paraqshasyna jazdy.
“Jýrnalısıkanyń qurmetti ustazy, bárimizdi oqytqan ardager Káken Qamzın aýyr jaǵdaıǵa dýshar boldy” dep jazǵan edi shákirti ári áriptesimiz Aıbar Oljaev.
Avtordyń jazbasyna súıensek, Káken Qamzın qartaıǵan shaǵynda jalǵyz úıinen aırylyp qalǵaly tur.
Alaıaqtar ardager jýrnalıs, profesordyń sengishtigin paıdalanyp kınodaǵydaı áreket etken. Aldymen Energosbyt adamdary retinde habarlasyp, meken-jaıy, JSN, páteri týraly aqparatty bilip alǵan.
Artynan Ulttyq qaýipsizdik komıtetiniń atyn jamylyp, habarlasyp, úıin bireýler tartyp alaıyn dep turǵanyn aıtyp, tez satýǵa kóndirip, al aqshany Ulttyq banktiń arnaıy shotynda saqtaısyz dep aldaǵan.
Profesor notarıýs arqyly úıin satyp, aqshany alaıaqtar jibergen kýrerge bere salǵan.
Qazir Almaty qalasy Áýezov aýdandyq polısıa departamentinde qylmystyq is qozǵaldy. Almaty qalasynyń Polısıa departamentinen osy rezonansty iske barynsha jumylýdy suraımyn. İshki ister mınıstri, qurmetti Erjan Sadenov, osy isti jeke baqylaýǵa alsańyz nur ústine nur bolar edi.
Sot arqyly úıdi satý mámilesin zańsyz dep taný úshin advokattardyń kómegi kerek. Syılaıtyn aǵamyz Abzal Quspan kásibı keńes berse úlken kómek bolady.
Parlament depýtattary, profesor shákirtteri Janarbek Áshimjan, Nartaı Sarsenǵalıev, Maqsat Tolyqbaı, arda jýrnalıs Ermurat Bapı osy isti nazarǵa alyp, úlken rezonans týǵyzsa, profesordy qorǵaı alamyz.
Dál qazir Káken Qamzın jalǵyz, úıinde barıkada quryp bekinip jatyr. Páterdi satyp alǵandar keshke, túnde kelip qoqan-loqqy kórsetken. İs nasyrǵa shaýyp barady, - dep jazdy avtor.