Ázerbaıjannyń Zagatala qalasynyń turǵyny Nýrýlla Sıradjov Aqtaý mańynda apatqa ushyraǵan "Ázerbaıjan áýe jelileri" (AZAL) ushaǵynyń jolaýshysy retinde zardap shekken edi. Ol 18 qazanda tańerteń óz úıinde qaıtys boldy, - dep habarlaıdy aqshamnews.kz Lent.az-ǵa silteme jasap.
Oqıǵa kúni Nýrýlla Sıradjov jubaıymen birge Groznyıǵa bara jatqan. Basylymnyń aıtýynsha, olar uldaryn kórýge ushqan, sonymen qatar, er adam qaterli isikke qatysty ota jasatpaq bolǵan. Alaıda apatqa baılanysty operasıa keıinge qalǵan. Erli-zaıypty aýyr jaraqat alyp, Bakýdegi aýrýhanaǵa jetkizilgen. Jaraqattan aıyqqanyna qaramastan, Sıradjov aýrýdy jeńe almady.
Eske salaıyq, AZAL ushaǵy 2024 jylǵy 25 jeltoqsanda Bakýden Groznyıǵa ushyp bara jatyp, Aqtaý mańynda qulady. Bortta 62 jolaýshy jáne 5 ekıpaj múshesi bolǵan, olardyń 29-y aman qaldy. Keıin Ázerbaıjan tarapy oqıǵaǵa reseılik áskerılerdi aıyptap, olardyń qatysy baryn rastaıtyn dálelder usynǵan. 2025 jylǵy qazanda Vladımır Pýtın Ilham Álıevpen kezdesýde Reseıdiń kinásin moıyndap, AZAL ushaǵynyń apatyn, sonyń ishinde reseılik áýe keńistiginde ýkraın drondarynyń bolýymen baılanystyrdy. Sondaı-aq, ol atyp túsirilgen ushaq úshin Ázerbaıjanǵa ótemaqy tóleýge ýáde berdi.