Memlekettik kirister komıtetiniń dereginshe, 2022 jyldyń 1 qańtarynan bastap Qazaqstanda ınternet arqyly taýar usynatyn nemese elektrondy qyzmet kórsetetin sheteldik kompanıalarǵa qatysty jańa salyq tetigi engizilgen, dep habarlaıdy Aqshamnews.kz tilshisi.
Kópshilikke «Google salyǵy» retinde belgili bul mehanızm sheteldik platformalardy Qazaqstanda tirkelýge jáne 12% mólsherlememen qosylǵan qun salyǵyn tóleýge mindetteıdi.
Qazirgi tańda elimizde 118 sheteldik kompanıa tirkelgen. Olardyń qatarynda Apple, Microsoft, OpenAI, Canva, Valve jáne Temu sekildi álemdik alpaýyt brendter bar. 2025 jyldyń ózinde Chess.com, Canyon Bicycles GmbH jáne taǵy 20 kompanıa tizimge qosylǵan.
Komıtettiń málimetinshe, jańa júıe kúshine engennen beri sheteldik ınternet-platformalar Qazaqstan búdjetine 118,4 mlrd teńge aýdarǵan. Onyń 48,6 mlrd teńgesi 2025 jyldaǵy túsim, bul ótken jyldyń sáıkes kezeńimen salystyrǵanda 20 mlrd teńgege artyq.
2025 jyly eń iri salyq tóleýshilerdiń alǵashqy úshtigine Valve Corporation (8,6 mlrd tg), Apple (8 mlrd tg) jáne Temu (6,2 mlrd tg) kirgen.
Vedomstvo Qazaqstan engizgen bul model EYDU usynymdaryna sáıkes keletinin jáne álemdik tájirıbege tolyq saı ekenin atap ótti. Osyndaı sıfrlyq salyqtar Eýropalyq odaq elderinde, Ulybrıtanıada, Kanadada, Úndistanda, Japonıa men Avstralıada da qoldanylady.
Komıtet ókilderi «sıfrlyq QQS» engizý bir jaǵynan memlekettik búdjettiń kirisin ulǵaıtsa, ekinshi jaǵynan otandyq IT-kompanıalar úshin teń básekelestik alań qalyptastyryp, sıfrlyq qyzmetter naryǵynda ashyqtyq pen ádildikti arttyrǵanyn jetkizdi.