Óńirlik komýnıkasıalar qyzmetiniń alańynda «Áıelder jáne qoǵamdyq bastamalar: analardyń el damýyna qosqan úlesi» taqyrybynda brıfıń ótti.
Spıkerler Analar keńesiniń jobalary, otbasylardy qoldaý jáne áıelder kásipkerligin damytý jóninde aıtyp berdi, - dep habarlaıdy Aqshamnews.kz.
Qazaqstan halqy Assambleıasynyń Analar keńesiniń tóraıymy Zýlfıa Hýseınova uıymnyń 2014 jyly Assambleıa janyndaǵy keńesshi organ retinde qurylǵanyn eske saldy. Qazir quramynda túrli ult pen kásip ókilderinen quralǵan qyryqtan astam áıel bar. Olardyń basyn qosqan ortaq maqsat — jastarǵa otandy súıýdi, qundylyqtardy qurmetteýdi úıretý.
«Biz balalar úılerin, daǵdarys ortalyqtaryn, analar úılerin qamqorlyǵymyzǵa alyp, ákimdikpen tyǵyz baılanysta jumys istep, qalanyń barlyq áleýmettik aksıasyna qatysyp otyramyz», - deıdi Hýseınova.
Keńestiń negizgi bastamalarynyń qatarynda «Salaýatty sana», «Balanyń bóteni bolmaıdy», «Mektepke jol» jáne «Portfel» jobalary bar. Bul bastamalar balalar men analardy qoldaýǵa, sondaı-aq otbasy ınstıtýtyn nyǵaıtýǵa baǵyttalǵan. Áıelderdi qoldaý máselesine erekshe nazar aýdarylǵan. Hýseınovanyń aıtýynsha, jalǵyzbasty analar men kópbalaly otbasylar memleket tarapynan aı saıynǵy járdemaqylar, jeńildetilgen baspana men jumyspen qamtý baǵdarlamalary túrinde kómek ala alady.
«Almatyda “Áıelder áıelder úshin” jobasy júzege asyryla bastady, ol analarǵa jumysqa ornalasyp, kásip ashýǵa kómektesedi», - deıdi ol.
«Qazaqstandyq dúngen qoǵamy» qoǵamdyq birlestigi fılıaly Analar keńesiniń tóraıymy Rımma Masyrova Analar keńesiniń qyzmeti 2030 jylǵa deıingi Qazaqstan Respýblıkasynyń otbasylyq jáne genderlik saıasaty tujyrymdamasyna sáıkes júrgiziletinin atap ótti. «Áıel bir qolymen besikti terbetse, ekinshi qolymen álemdi terbetedi. Otbasyny nyǵaıtý, jastardy tárbıeleý, nashaqorlyq, oıynqumarlyq, turmystyq zorlyq sıaqty áleýmettik máselemen kúresý sıaqty úlken mindet júktelgen bizge», - deıdi ol.
Masyrovanyń aıtýynsha, 2007 jylǵy alǵashqy bastamalardan bastap jastar tárbıesi men mádenı murany saqtaýǵa áıelderdi belsendi tartýǵa deıin Analar keńesi tórt damý kezeńinen ótken. Qazaqstan halqy Assambleıasy aıasynda bir shańyraq astynda 130-dan astam etnos ókilderi birigip otyr.
Áıelder kásipkerligin damytý máselesine toqtalǵan Masyrova «Úmit» jáne «Áıelder bızneste» baǵdarlamalarynyń tabysty júzege asyp jatqanyn aıtty. Bul baǵdarlamalar áıelderge jeńildetilgen nesıe alyp, óz isin ashýǵa múmkindik beredi. «Búginde áıelder 1,5 mıllıon teńgege deıin bastapqy kapıtal ala alady. Qyzdar óz ıdeıasyn seskenbeı iske asyrýy úshin ýnıversıtetterde kásipkerlikke qatysty kýrstar engizildi», - dedi ol.
Qalalyq uıǵyr mádenı ortalyǵy Analar keńesiniń tóraıymy Roza Ababahrıeva rýhanı tárbıe men otbasylardy qoldaý baǵytyndaǵy jumys týraly aıtty.
«Biz otbasy, rýhanıat jáne bilim máseleleri boıynsha kezdesýler men dóńgelek ústelder ótkizemiz. Áleýmettik jobalardy júzege asyryp, muqtaj jandarǵa psıhologıalyq, quqyqtyq kómek beremiz. Meıirim aksıalaryn uıymdastyryp, ardagerlerge, múmkindigi shekteýli jandarǵa, jalǵyzbasty analar men qart adamdarǵa qoldaý kórsetemiz», - dedi ol.
Onyń aıtýynsha, Almatyda jyl saıyn Qarttar kúnine oraı barlyq etnomádenı birlestikter qatysatyn qaıyrymdylyq marafondary ótkiziledi. Analar keńesteri qıyn jaǵdaıǵa tap bolǵan áıelderge psıhologıalyq kómek te kórsetedi. Oqý-aǵartý mınıstrliginiń derekterine súıensek, tek sońǵy jyldyń ózinde Analar keńesteri janyndaǵy psıhologıalyq kómek ortalyqtary 13 myńnan astam bala men 10 myń ata-anaǵa qoldaý kórsetken.
Zýlfıa Hýseınova kez kelgen belsendi, el taǵdyryna beıjaı qaramaıtyn áıel Analar keńesiniń múshesi bola alatynyn aıtty. «Eń bastysy — júrektiń meıirimdiligi men beriktigi. Biz jıi balalar úılerinde, daǵdarys ortalyqtarynda bolamyz, munda jaı ǵana qamqorlyq kórsetip qana qoımaı, adamnyń ózi de sezimge erik bermeıtindeı myqty bolýy kerek», - deıdi.
Brıfıń sońynda spıkerler bıyl Almatyda «Salaýatty sana», «Jomart jan» jáne «Adal azamat» sıaqty áleýmettik bastamalar jalǵasyn tabatynyn, sondaı-aq jaqynda qurylǵan Qazaqstan halqy Assambleıasy janyndaǵy Aqsaqaldar keńesimen birlesip jumys júrgiziletinin atap ótti.