Alda kele jatqan Táýelsizdik kúni merekesine oraı elimizdiń túkpir-túkpirinde túrli is-sharalar kesheni uıymdastyrylyp jatyr.
Osyndaı bir tamasha shara S.Amanjolov atyndaǵy Shyǵys Qazaqstan ýnıversıtetiniń rektory, profesor Tólegen Muhtar Ádilbekulynyń qoldaýymen qurylǵan «Semser» aqyndar mektebinde ótti.
Stýdentter Táýelsizdik kúni men Demokratıalyq jańǵyrý kúnine arnap óleń-jyrdan shashý shashty. Sonyń bir parasyn Almatynyń bas basylymy «Almaty aqshamy» gazetine joldapty.
Bekarys SEKEN,
S.Amanjolov atyndaǵy SHQÝ-niń 2-kýrs stýdenti.
TÁÝELSİZDİK
Ańsaǵany osy emes pe azat kún?!
Bodandyqta buǵaýlanǵan qazaqtyń.
Gúlge oranyp gúldense de qandy alań,
Kúrmeýinen tarqamaıdy azap muń.
Dámin tatpaı erkindiktiń tátti nur,
Azattyqtyń tańy atqan ba, kóp ǵumyr?!
Shyryldaǵan shybyn janǵa qaramaı,
Qyrshyn jastyń qabyrǵasyn sókti bir.
Qara jerim qanǵa toımaı ul-qyzdyń,
Mańdaıdaǵy sónip ketti juldyzym.
«Eske alsyn!» dep keler urpaq aldyna,
Ornatyldy olar úshin «Qur músin».
Lázzattardyń kóz jasyna qanbaǵan,
Qasiretsiń qanǵa tolǵan qandy alań.
Teń kelmeıtin teńdessizsiń, Azattyq!
Bul ómirde budan basqa bar ma mán?!
Aıamadyń eldiń janyn múshkilin,
Seksen alty talaı náýbet qushtyrdyń.
Kórdi dáýir Qaırattardyń kózinen
Egemen el, táýelsizdik ushqynyn.
Mine, búgin, erkindigim eńseli,
Erkindiktiń joq ómirde ólshemi!
Súıip ótem sońǵy demim qalǵansha,
Qazaqstanym, men seni!
Aıbar RAMAZAN,
S.Amanjolov atyndaǵy SHQÝ-niń 3-kýrs stýdenti
JELTOQSAN JAŃǴYRYǴY
Babalardyń armany ǵasyr kútken,
Egemendik el úshin asyl tipten.
Analary sen úshin taqym qysyp,
Balalary báıgege basyn tikken.
San ǵasyr oıyńa alyp armandaǵan,
Qalaıdy eken táýelsiz tańdardy adam.
Bolǵany anyq Jeltoqsan jańǵyryǵy,
Tańbalanyp tarıhta qalǵan baǵań.
Belgili ǵoı tarıhta baǵań bary,
Egemendik - elimniń bar armany.
Sońǵy núkte qoıam dep este qaldy,
Máńgilikke jas jandar alańdaǵy.
Jaralǵandaı jandarmyz izgilikten,
Qaýyp tónse, qashpaımyz biz búlikten.
Jıyrmanyń bolypty mańaıynda,
Túıir janyn tárk etken qyz-jigitter.
Dos bolǵanǵa syılasar ar-ıbamyz,
"Qas qylǵanǵa qarsy shap" - qaǵıdamyz.
«Bórikti qazaǵym!» dep atoı salǵan,
Bolypty on altyda Sábıra qyz.
Eldikti jaqyndatty alystaǵan,
Naǵyz erde qashanda namys bolar.
Erlerdi umytpaıyq, ulyqtaıyq,
Elime egemendik tabystaǵan.
Qazaǵym taýsylmasyn otty oılaryń,
Eldiktiń merekesin kóp toılaǵyn.
Tiliń, diniń saqtaýly bolsyn, elim,
Kórsin elim kóginen Kók baıraǵyn!
Ernur JUMATAI,
S.Amanjolov atyndaǵy SHQÝ-niń 3-kýrs stýdenti
TÁÝELSİZ QAZAQSTAN
Aqtardym aq paraqqa táýelsizdik kemelin,
Ańsatqan talaı jannyń aq armany sen ediń.
Atyńdy urandatqan qan maıdanda babalar,
Altyn árip, altyn sóz bıik usta, órenim.
Qanym qazaq, qaısar elmiz, súıgenimiz bostandyq,
Arly esim, tekti ult, atyńdy aıtam aspan ǵyp.
Tarıhym bar, maqtanamyn el qorǵaǵan batyrmen,
Búgingi kún urpaǵy, elge qylma qastandyq.
Talaı balań shyrqady Tý kóterip uranmen,
Azattyqty terbetti, asqaqtatyp jyr-ánmen.
Jasa qazaq, jasaı bergin, tanylshy bar álemge,
Bostandyqtyń sımvoly – barys penen qyranmen.
Atyń máshhúr ózgelerge baılyǵyńmen kıeli,
Ózge ulttyń ózi de Otanym dep súıedi.
Qut daryǵan bul mekenim - Táýelsizdik ordasy,
Ushqan qus pen ósken gúl de basyn saǵan ıedi.
Ulan-ǵaıyr jerim bar, Jeruıyǵym mekenim,
Kók Týyńdy kóterýdi men de arman etemin.
Kók bórimiz, bodan bolý qazaǵyma tán emes,
Bóri bolsaq, bilý kerek ol da erkin ekenin.
SANJAR SULTANǴAZY
S.Amanjolov atyndaǵy SHQÝ-niń 2-kýrs stýdenti
QAZAQ DEGEN...
Súı júregim, barlyǵyn súı, azyna,
Qoparyl da,
Tereńdeı ber
Qazyla.
Tilmen aıtyp jetkize almas,
Bar mende,
Baılyq bolyp sanalatyn qazyna!
Júregime qonyp qalǵan mekendep,
Qazaq úshin jyrmen jumys, óteý kóp!
EL degende eshteńeni estimeı,
Eleńdeımin «Halqym aman ba eken?! dep.
Óz aýylym - appaǵym da maqtanym,
Belgili ǵoı senen baqyt tapqanym.
Qaladaǵy vanadan da
Artyqtaý,
TÝǴAN JERDİŃ tumasyna batqanym.
Tósime de meıli batsyn aıyl-muń,
ANA dese, aq kilem bop jaıyldym.
ANA dese, aq basymdy ıiltip,
Aldyna onyń jatýǵa da daıynmyn.
Tura almaımyn elim dese kúımeı tym,
Jan bar me eken óz ultyn da súımeıtin?
QAZAQ degen bes árip qoı,
Bes saýsaq,
Jumylsa eger, jerdiń betin bıleıtin.
Otyrǵanda jan-jaq túgel jalaqtaı,
Shaba berý qıyn, sirá, dalaqtaı.
TİL degende qaıyspasa qabyrǵa,
Maıysýǵa týra keler sadaqtaı.
Aqyndarsyz kóktem men, ras, kúz ólmes,
Jazýshy da bolǵan joq-ty minelmes.
Qazaǵymnyń taǵdyry ol – ÁDEBIET,
Odan aınyp,
Taǵdyrymyz túzelmes.
Ótken deıtin búginginiń deregi,
Keshegiler búgingige senedi.
Baqyt qansha qymbat bolsa,
Sonshalyq,
Qaıǵymenen,
Qasiretpen keledi...
Muhammet TİLEÝBAI,
S.Amanjolov atyndaǵy SHQÝ-niń 4-kýrs stýdenti
ALMATY - TÁÝELSİZDİK TURAǴYSYŃ!
Aıtaıyn, tyńdap kórseń jyr aǵysyn,
Jasyrmaı búgin balań qýanyshyn.
Kóne shahar, tarıhtyń kózi bolǵan
ALMATY – ǵasyrlardyń kýásisiń.
Qamdaǵan talaı ulttyń suranysyn,
Kenezesi kepken janǵa bulaǵysyń.
Jeltoqsannyń jandyrǵan alaýly otyn,
ALMATY – azattyqtyń shyraǵysyń.
Qurban qylǵan Qaırattaı qyraǵysyn,
El men jurt aıtady áli myń alǵysyn.
Aqyndardyń sherlengen óleńimen,
ALMATY – beıbit kúnniń jyr-ánisiń.
Tappaǵan ómiriniń bir mánisin,
Arylar saǵan kelse kúmáni shyn.
Gúldengen ár kún saıyn sulý qala,
ALMATY – ásemdiktiń syńarysyń.
Shyǵarǵan talaı myqty, kil arysyn,
Jan qıǵan ultymyzdyń til, ary úshin.
Bastalǵan egemendik tańy sende,
ALMATY – Táýelsizdik turaǵysyń...
Stýdentterdiń óleń-toptamasyn ázirlegen
S.Amanjolov atyndaǵy SHQÝ-diń
«Semser» aqyndar mektebiniń jetekshisi,
aqyn Serik QUSANBAEV.
«Almaty-akshamý» №147 (6282) 13 jeltoqsan, seısenbi, 2022 jyl