Qasym-Jomart Toqaev birqatar ustazǵa bilim berý salasyna qosqan eleýli úlesi men erekshe eńbegi úshin memlekettik nagradalar tabystady, dep habarlaıdy Aqshamnews.kz Aqordaǵa silteme jasap.
Memleket basshysy muǵalimderdiń kásibı merekesi elimizde erekshe atalyp ótetinin jetkizip, ustazdar qaýymyna zor qurmet kórsetiletinin aıtty.
"Mirjaqyp Dýlatuly «Halyqqa eń paıdaly adam – muǵalim» degen. Muǵalim – ár azamat úshin óte qadirli tulǵa. Basqa sózben aıtqanda, muǵalim – árbir balaǵa ómir jolyn kórsetedi. Ustaz – tálim-tárbıe men bilimniń qaınar kózi. Kez kelgen qoǵamnyń kemeldigi, órkenıettiligi ustazǵa degen qatynasymen ólshenedi. Ustazyn ulyqtaǵan eldiń urpaǵy sanaly, bolashaǵy jarqyn bolary haq. Sebebi ár muǵalimniń eńbegi – eren, elimizdiń damýyna qosqan úlesi – orasan. Sondyqtan búgin men bilim berý salasynda eńbek etip júrgen barsha azamatqa shynaıy rızashylyǵymdy bildiremin", – dedi Qasym-Jomart Toqaev.
Memleket basshysy ozyq oıly ult bolý úshin eń aldymen, bilim-ǵylymnyń damýyna basa mán berýimiz kerek dep sanaıdy.
"Sońǵy bes jylda elimizde osy baǵytta kóp jumys isteldi. Bilim salasyna bólinetin qarjy úsh ese artty. 1200 jańa mektep ashyldy. «Keleshek mektepteri» ulttyq jobasy júzege asyrylyp jatyr. Osy joba boıynsha zaman talabyna saı 150 bilim oshaǵy salyndy. Sondaı-aq osyndaı 67 mekteptiń qurylysy júrip jatyr. Balalardyń sapaly bilim alýyna qajetti barlyq jaǵdaı jasalýda. Bul derekti halyq bilýi kerek, sebebi memleket jas urpaqtyń bilimine jáne ustazdardyń jaǵdaıyna basa nazar aýdaryp jatyr. Biz pedagogterdiń mártebesin kóterip, áleýmettik jaǵdaıyn jaqsartý úshin naqty sharalardy qolǵa aldyq. Arnaıy zań qabyldadyq. Búginde ustazdardyń jalaqysy 2 ese ósti", – dedi Prezıdent.
Jıynda Qasym-Jomart Toqaev bilim berý salasyna qosqan eleýli úlesi jáne Qazaqstan Respýblıkasyna sińirgen aıryqsha eńbegi úshin bir top ustazdy memlekettik nagradamen marapattady.