Jańa órt sóndirý beketi oqıǵa ornyna barý ýaqytyn qysqartady.
Órt qaýipsizdigi men azamattyq qorǵanysty qamtamasyz etý sharalary aıasynda Aqjar shaǵynaýdanynda 1,5 jyldan az ýaqytta órt sóndirý deposy salyndy. Qala kúni bólimsheniń ashylýy ótti, onyń jaýapkershilik aımaǵynda Naýryzbaı aýdanynyń 159 myńnan astam turǵyny bar, dep habarlaıdy Almaty-akshamy.kz.
Almaty qalasynyń ákimi Baqytjan Saǵyntaev órt sóndirýshilerdi bólimsheniń ashylýymen quttyqtap, qyzmetteri úshin alǵysyn bildirdi. Jańa órt sóndirý beketi oqıǵa ornyna barý ýaqytyn qysqartady jáne órt qaýipsizdiginiń tıimdiligin arttyrady. Qala ákimi bólimsheni, garnızon qyzmetkerlerine arnalǵan jataqhanany qarap shyqty. Sonymen qatar órt sóndirýshilerge qyzmettik kólikterdiń kilti tabystaldy.
Ashylý saltanatyna QR Tótenshe jaǵdaılar mınıstrliginiń ókilderi, Tótenshe jaǵdaılar departamentiniń basshylyǵy, qyzmettiń ardagerleri de qatysty.
2014 jyly qurylǵan Naýryzbaı aýdanyna Jaılaý, Qaraǵaıly, Quramys, Rahat, Qarǵaly, Taýsamaly, Aqjar, Tastybulaq, Taýjoly, Shuǵyla, Altyn Alash, Qalqaman-1, 2, 3 shaǵynaýdandary kiredi. Jalpy turǵyndar sany – 130 108 adam.
Qalaǵa qosylǵan aýmaqta órt sóndirý beketi bolmady, sondyqtan Aqjar shaǵyn aýdanynda órt sóndirý posty uıymdastyryldy. 2015 jyldan beri bul bólimshe 700-den astam shaqyrtýlarǵa bardy.
Eki qabatty depo ǵımaratynyń qurylysy 1,5 jyldan da az ýaqyt ishinde aıaqtaldy. Órt sóndirý bólimi jalpy alańy 3,2 myń sharshy metrge jýyq alty shaqyrtýǵa eseptelgen.
Avtosısternalar órt sóndirý bóliminiń qoraptaryna ornalastyrylady. Aýdannyń belsendi damýyn eskere otyryp, órtti sóndirýge arnalǵan qural-jabdyqtarmen birge, bólim bıik úılerge arnalǵan arnaıy kóliktermen jabdyqtalatyn bolady.
Búginde Almaty qalasynyń órtten qaýipsizdigin 17 bólimshe qamtamasyz etedi. Órt sóndirý qyzmeti 157 birliktegi órt sóndiretin avtotehnıkamen jasaqtalǵan, kún saıyn táýliktik kezekshilikke 250-ge jýyq adam shyǵady. Bıyl jergilikti búdjet esebinen garnızon taǵy 45 birlik tehnıkamen tolyqtyrylady.
Qazirgi ýaqytta órt qaýipsizdigin kúsheıtý jáne tótenshe jaǵdaılarǵa der kezinde den qoıý maqsatynda Alataý aýdanynda órt sóndirý beketiniń qurylysy aıaqtalýda. Bostandyq aýdanynyń Nur-Alataý shaǵynaýdanyndaǵy 4 shaqyrtýǵa bara alatyn órt sóndirý beketiniń qurylysy júrgizilýde.