Uıymdastyrýshylar jaýapqa tartylady.
Meıramhanalarda, kafelerde, dúkenderde, sulýlyq salondarynda, avtosalondarda jáne kompúterlik klýbtarda túngi tekserý júrgizildi. Monıtorıń toptarynyń ókilderi buzýshylarǵa karantın talaptaryn túsindirdi, dep habarlaıdy Almaty-akshamy.kz.
25 tamyzda qalanyń Naýryzbaı aýdanyndaǵy «Samır» meıramhanasynda tekserýshiler kóp qonaq shaqyrylǵan toıdy toqtatty. Bul fakt boıynsha materıal jınaldy, úılený toıyn uıymdastyrýshylar jaýapqa tartylady.
Tamyzdyń 24-inen 25-ine qaraǵan túni monıtorıń toptarynyń ókilderi qalanyń bas memlekettik sanıtarlyq dárigeriniń karantındik talaptary boıynsha 17 buzýshylyqty anyqtady.
1 qańtardan 25 tamyzǵa deıingi aralyqta júrgizilgen tekserýler 36 228 obektini qamtydy, karantındik sharalardy buzǵan 3390 obektiler anyqtaldy. 5457 hattama jasaldy, onyń ishinde zańdy tulǵalarǵa shamamen 199 mln teńgege 565 hattama toltyryldy. Jeke tulǵalarǵa qatysty maska rejımin buzǵany úshin shamamen 215 mln teńgeni quraıtyn 4892 hattama jasaldy.
Karantın erejelerin júıeli túrde buzǵany úshin mamandandyrylǵan aýdanaralyq ákimshilik sottarǵa 75 is jiberildi, 65 is boıynsha qyzmetti toqtatý týraly sheshimder qabyldandy. Qazirgi ýaqytta Almaty qalasynyń sottary turaqty tártip buzýshylarǵa qatysty 8 isti qaraýda.
Qala ákimdigi azamattardy karantındik shekteýlerdi saqtaýǵa, ruqsat etilgen jumys kestesinen tys oıyn-saýyq mekemelerine barmaýǵa jáne maska rejımin ustanýǵa shaqyrady.
Aıta keterligi, Almatyda koronavırýsqa baılanysty jaǵdaı shıelenisip tur. 26 tamyzda KVI ınfeksıasynyń 1561 jańa jaǵdaıy tirkeldi. Infeksıalyq stasıonarlarda 5765 adam bar, onyń 166-sy balalar. Reanımasıa bóliminde 469 naýqas jatyr, 26 adam ÓJJ apparatyna, 196 adam ınvazıvti emes ÓJJ apparatyna, 216 naýqas High flow apparatyna qosylǵan.
Búginde 12 868 naýqas úıde AMSK pen Telemedısına ortalyǵynyń mobıldi toptarynyń baqylaýynda.