Qalada 40 monıtorıń top qarqyndy jumys jasaýda.
Almatyda «delta» úndi shtamynyń aınalymy saldarynan koronavırýs ınfeksıasyn juqtyrǵandar sany ósýde. Almaty «qyzyl aımaqta». Megapolıste qala turǵyndarynyń densaýlyǵyn saqtaý maqsatynda adamdardyń kóp jınalýyn jáne qaıta juqtyrýdy boldyrmaý úshin shekteý sharalary kúsheıtildi, dep habarlaıdy Almaty-akshamy.kz.
Monıtorıń toptar óz kezeginde shekteýlerdiń saqtalýyn baqylaıtyn bolady.
Juqtyrýdyń aldyn alý tetigin jetildirý aıasynda koronavırýs ınfeksıasynyń taralýyn boldyrmaý jónindegi qalalyq shtab qalalyq prokýratýramen jáne «Atamekenniń» óńirlik palatasymen birge monıtorıń toptarynyń jumysyn sıfrlyq formatqa kóshirý týraly sheshim qabyldady.
Almatyda monıtorıń toptarynyń jumysyn sıfrlandyrý jumys qorytyndysy týraly málimetterdi óńdeý men tirkeý sapasyn jaqsartady. Máselen, Almaty qalasy boıynsha monıtorıń toptaryn baqylaý modýli monıtorıń toptarynyń jumysyn naqty ýaqyt rejıminde baqylaýǵa jáne ózekti taldaýlardy engizýge múmkindik beredi. Nátıjesinde tekserýshilerdiń qaı nysandarǵa jıi baratyny, reıdtik baǵyttar rejıminiń saqtalýy jáne t.b. týraly aqparat qoljetimdi bolady. Sonymen qatar, megapolıs prokýratýrasynda atap ótkendeı, monıtorıń toptarynyń jumysy tek osy modýldi qoldanǵan kezde ǵana zańdy bolady.
Endi monıtorıń toptarynyń kásipkerlerge kelýi dereý jazylatyn bolady, bazanyń ózi elektrondy jazbalardy júrgizedi. Platforma monıtorıń nysanynyń mekenjaıyn avtomatty túrde anyqtaıdy. Kásipkerdiń qatysýymen barlyq ıdentıfıkasıalanǵan tártip buzýshylyǵy, qabyldanǵan sharalar kórsetilimi jazylǵan shablon toltyrylady.
Eske salsaq, monıtorıń toptary bıznes sýbektilerin bes talap boıynsha tekseredi:
- jumys rejımin saqtaý;
- kóptegen adamdarmen is-sharalar ótkizý;
- áleýmettik araqashyqtyqty saqtaý;
- betperde rejımin saqtaý;
- kelýshiler sanynyń lımıtin saqtaý.
Monıtorıńtik toptardyń zańsyz áreketteri men sheshimderiniń barlyq faktileri boıynsha kásipkerler prokýratýraǵa 8-701-775-55-00 nómiri arqyly habarlasa alady.
Almatyda 40 monıtorıń top qarqyndy jumys jasaýda. Máselen, jyl basynan beri 3195 tekserý júrgizildi, 30 279 nysan qamtyldy, karantın sharalaryn buzǵan 2682 nysan anyqtaldy. Jeke jáne zańdy tulǵalarǵa jalpy somasy 350 mln teńgeden asatyn 4730 hattama toltyryldy. Sottarǵa 75 materıal jiberildi (462-bap, 3-bólim jáne 425-bap, 1-bólim boıynsha), onyń ishinde 64 materıal boıynsha sheshimder qabyldandy. Ótken aptada 12-17 shilde aralyǵynda 829 nysannyń karantın sharalaryn saqtaýy tekserildi, 78 nysannyń buzýshylyǵy anyqtaldy. Demalys kúnderi, 16-18 shilde aralyǵynda, Almaty qalasy boıynsha 27 zańdy tulǵanyń zań buzǵany belgili boldy.