Qazaqstan Úkimetiniń músheleri German qoǵamynyń óńirlik jobasynyń jetekshisimen kezdesti.
Qazaqstan jáne Germanıa mamandary kezdesip, Aral máselelerin talqylady, dep habarlaıdy Almaty-akshamy.kz.
«Qazaqstannyń Ekologıa, geologıa jáne tabıǵı resýrstar vıse-mınıstri Álıa Shalabekova «Aral óńiriniń ekologıalyq baǵdarlanǵan óńirlik damýy» halyqaralyq yntymaqtastyq jónindegi German qoǵamynyń (GIZ) óńirlik jobasynyń jetekshisi Paýl Shýmahermen kezdesti», – delingen atalmysh mınıstrliktiń baspasóz qyzmetiniń habarlamasynda.
Paýl Shýmaher vıse-mınıstrdi Aral óńirindegi ekologıalyq jaǵdaıdy jaqsartý boıynsha birqatar is-sharalar iske asyrylyp jatqan atalǵan óńirlik jobanyń aǵymdaǵy jyldyń basynda bastalǵany týraly habardar etti.
Óz kezeginde Álıa Shalabekova Mınıstrliktiń GIZ-men túrli jobalar boıynsha jemisti yntymaqtastyǵyn atap ótip, ekologıa jáne qorshaǵan ortany qorǵaý salasynda tehnıkalyq kómek kórsetkeni úshin alǵysyn bildirdi.
Resmı derek boıynsha, kezdesý barysynda taraptar kógaldandyrý, landshaftqa keshendi monıtorıń júrgizý jáne Aral teńiziniń qurǵaǵan tabanyn kartografıalaý salasyndaǵy yntymaqtastyqtyń basym baǵyttaryn, sondaı-aq klımattyń ózgerýine beıimdelý, balyq sharýashylyǵyn damytý, tabıǵatty qorǵaý is-sharalaryna jergilikti halyqty tartý máselelerin talqylady.
Kezdesý qorytyndysy boıynsha taraptar yntymaqtastyqty odan ári nyǵaıtýǵa jáne GIZ jobasyna Qazaqstanda jan-jaqty qoldaý kórsetýge daıyn ekendikterin bildirdi.
Anyqtama «Aral óńiriniń ekologıalyq baǵdarlanǵan óńirlik damýy» óńirlik jobasy Germanıanyń ekonomıkalyq yntymaqtastyq jáne damý federaldyq mınıstrliginiń tapsyrmasy boıynsha júzege asyrylady jáne ony halyqaralyq yntymaqtastyq jónindegi Germanıa qoǵamy (GIZ) iske asyrady. Joba Aral óńiriniń ekologıalyq ornyqty transshekaralyq ekonomıkalyq damýyn qamtamasyz etýde Qazaqstan men Ózbekstan úkimetterine qoldaý kórsetedi.