Almatynyń Jetisý aýdanynda «№1 qalalyq emhananyń» jańa fılıaly ashyldy ótti, dep habarlaıdy qalalyq Qoǵamdyq densaýlyq saqtaý basqarmasy. Medısınalyq nysandy paıdalanýǵa berý medısınalyq-sanıtarlyq alǵashqy kómektiń qoljetimdiligin arttyrýǵa jáne aýdan turǵyndaryna kórsetiletin qyzmet sapasyn jaqsartýǵa baǵyttalǵan.
Fılıalda medısınalyq-sanıtarlyq alǵashqy kómektiń tájirıbeli dárigerler men tar beıindi mamandardyń qabyldaýy, profılaktıkalyq tekserýler men vaksınasıa, júkti áıelder men balalardy baqylaý, sozylmaly aýrýlary bar naýqastardy qadaǵalaý jáne úıge baryp kómek kórsetý syndy qyzmettiń tolyq spektrin kórsetedi.
Medısınalyq mekeme qoldanystaǵy standarttarǵa sáıkes zamanaýı jabdyqtarmen tolyq qamtamasyz etilgen. Ǵımaratta, sonyń ishinde, múmkindigi shekteýli azamattar úshin de yńǵaıly ári qoljetimdi jaǵdaı jasalǵan. Fılıalda dárihana, sıfrlyq rentgen, zamanaýı ÝDZ jabdyqtary, LOR jáne oftalmolog kabınetteri, oqshaýlaǵyshtary bar bólek súzgi-bólmeler, qysqa tolqyndy, lazerlik, últradybystyq, elektr jáne magnıttik terapıaǵa arnalǵan jabdyqtarmen qamtylǵan fızıoterapıa kabıneti, robottandyrylǵan jabdyqtary bar ońaltý kabıneti, sondaı-aq beıneendoskopıalyq júıemen jabdyqtalǵan fıbrogastrodýodenoskopıa kabıneti jumys isteıdi. Akýsher-gınekolog kabıneti shaǵyn hırýrgıalyq aralasýlar men kardıotokografıa júrgizýge arnalǵan quraldarmen jabdyqtalǵan.
Fılıaldyń ashylýy qoldanystaǵy densaýlyq saqtaý uıymdaryna túsetin júktemeni azaıtyp, qabyldaýdy kútý ýaqytyn qysqartýǵa jáne aýdan turǵyndary úshin medısınalyq kómekti turǵylyqty jerine jaqyn jerde qoljetimdi etýge múmkindik beredi.
Aıta keteıik, búginde Jetisý aýdanynda shamamen 200 myńǵa jýyq turǵyn bar. Olardyń 135 myńy memlekettik emhanalarǵa tirkelgen bolsa, qalǵan turǵyndar qalanyń ózge aýdandaryndaǵy medısınalyq uıymdardyń qyzmetin paıdalanyp keledi. Jańa fılıaldy paıdalanýǵa berý pasıentter sanyn tıimdi qaıta bólýge jáne Jetisý aýdany turǵyndary esebinen tirkelgen halyq sanyn kezeń-kezeńimen 15,5 myńnan 30 myń adamǵa deıin ulǵaıtýǵa jaǵdaı jasaıdy, dedi Qoǵamdyq densaýlyq saqtaý basqarmasynyń ókilderi.