30 jeltoqsanda aýrýhananyń qabyldaý bólimin aýqymdy jańǵyrtý nátıjesi tanystyryldy. İs-sharaǵa Almaty qalasy ákiminiń orynbasary Nurlan Ábdirahym, Túrksib aýdanynyń ákimi Baqytjan Aqjarov jáne Almaty qalasy Qoǵamdyq densaýlyq saqtaý basqarmasynyń basshysy Marat Pashımov qatysty.
Joba aýrýhananyń ınfraqurylymyn jan-jaqty jańartý jáne medısınalyq kómektiń sapasyn júıeli túrde arttyrý maqsatynda iske asyryldy. Qaıta jańǵyrtý jumystarynan keıin qabyldaý bólimi táýligine 250 adamnan 450 adamǵa deıin qabyldaı alady. Bul óz kezeginde naýqastardyń kútý ýaqytyn qysqartyp, em-domdy bastaý ýaqytyn jedeldetýge múmkindik beredi.
№4 qalalyq klınıkalyq aýrýhana — táýlik boıy, jylyna 365 kún 24/7 rejıminde jumys isteıtin kópsalaly stasıonar. Munda jyl saıyn 12 500-ge deıin ota jasalady, al qabyldaý bólimi táýligine orta eseppen 250–300 pasıentke qyzmet kórsetedi. Medısınalyq uıymdaǵy qyzmetkerler sany — 1 118 adam, onyń ishinde 260 dáriger bar. Aýrýhananyń jobalyq qýaty — 385 oryn.
Aýrýhana kesheniniń jalpy aýmaǵy 47 myń sharshy metrden asady, onyń ishinde 7 myń sharshy metrge jýyq bóligi qaıta jańǵyrtýdan ótti. Jóndeý jumystary bes bólim men ǵımarattyń tórt blogynda, sonyń ishinde tehnıkalyq qabatta júrgizildi.
Jańǵyrtý barysynda pasıentterdi halyqaralyq triage-suryptaý júıesi engizildi. Adam sanyn qyzyl, sary jáne jasyl aımaqtarǵa bólinedi. Bul aýyr haldegi naýqastarǵa kómekti jedel kórsetýge, otadan keıingi asqynýlar men ólim-jitimdi azaıtýǵa, oryn aınalymyn arttyrýǵa jáne aýrýhanada jatý merzimin qysqartýǵa múmkindik beredi.
Aıta keteıik, qurylys kezeńinde aýrýhananyń jumysy toqtamady. Jobany júzege asyrý 2025 jyly naýryz aıynda bastalyp, sol jyldyń jeltoqsanynda aıaqtaldy.
Jańǵyrtý jumystarynan keıin aýrýhanada jańa operasıalyq zaldar ashylyp, 12 tósekke arnalǵan anestezıologıa, reanımasıa jáne qarqyndy terapıanyń shuǵyl bólimi uıymdastyryldy. Sonymen qatar, júrek-qan tamyr aýrýlary bar naýqastarǵa joǵary tehnologıaly kómek kórsetýge múmkindik beretin koronarlyq aralasýlar ortalyǵy jumysyn bastady.
Jobanyń júzege asyrylýy Almaty qalasynyń medısınalyq ınfraqurylymyn turaqty damytýǵa, ózge densaýlyq saqtaý mekemelerine túsetin júktemeni azaıtýǵa jáne megapolıs turǵyndary úshin joǵary tehnologıaly medısınalyq kómektiń qoljetimdiligin arttyrýǵa baǵyttalǵan.