Óńirlik komýnıkasıalar qyzmetiniń baspasóz alańynda Jetisý aýdanynyń ákimi Lázzat Jylqybaeva aýdannyń áleýmettik jáne bilim berý ınfraqurylymynyń damý barysy týraly baıandady. Ákimniń aıtýynsha, bıylǵy 10 aıda aýdan boıynsha jańa nysandardyń qurylysy qarqyndy júrip, bar mekemeni jańǵyrtýdy kózdeıtin qyrýar jumys istelip jatyr.
Jetisý aýdanynda 3 897 oqýshy ornyna tapshylyq bar. Bul máseleni sheshý maqsatynda «Keleshek mektepteri» ulttyq jobasy aıasynda naqty is-sharalar qabyldanypty. Qazirgi tańda Boraldaı kóshesinde 1 200 oryndyq jańa mekteptiń qurylysy aıaqtalyp qaldy. Nysannyń daıyndyq deńgeıi – 93%, ony 2025 jyldyń qarasha aıynda paıdalanýǵa berý josparlanǵan.
Sonymen qatar №43 pen №112 mektepterde qaıta jańartý jumystary júrgizilip jatyr. Al №87 mektepke qosymsha 300 oryndyq jańa ǵımarat salýǵa arnalǵan jobalyq-smetalyq qujattama ázirlene bastady.
Mekteppen qatar balabaqsha ınfraqurylymy da damyp keledi. Qazir №163 balabaqsha men Ratýshnyı kóshesi, 139 mekenjaıynda ornalasqan mektepke deıingi uıymdy keńeıtýge arnalǵan jobalyq-smetalyq qujattama daıyndalyp jatyr. Bul jumys keler jyldyń İ toqsanynda bastalady.
Medısınalyq ınfraqurylym salasynda da oń ózgeris bar. Aýdan aýmaǵynda jyl sońyna deıin eki jańa emhana ashylady: biri – Núsipbekov kóshesinde, ekinshisi – Omarov kóshesinde. Sondaı-aq, bıyl shilde aıynda №21 emhana kúrdeli jóndeýden ótip, paıdalanýǵa berilgen edi.
Áleýmettik salada memlekettik áleýmettik tapsyrys aıasynda bes joba iske asyryla bastady. Olardyń qatarynda otbasyny qoldaý ortalyǵy, múmkindigi shekteýli azamattarǵa kómek kórsetý ortalyǵy, «Shyńǵa órleý» áleýmettik klýby men eki belsendi uzaq ómir súrý ortalyǵy jáne bar.
Jyl basynan beri aýdan turǵyndaryna 11 myńnan astam áleýmettik qyzmet kórsetildi. Olardyń qatarynda psıhologıalyq jáne zańgerlik keńes berý, bilim berý men shyǵarmashylyq baǵyttaǵy sabaqtar bar.