Almaty ákímí Darhan Satybaldy Áuezov audanyna jūmys saparymen baryp, aulalardy kórkeıtu, naryqty qaıta jańǵyrtu jáne áleumettík medıtsınalyq nysan salu jobalarynyń júzege asu barysymen tanysty.
Jūmys sapary 10-shaǵynaudandaǵy «Halyq qatysatyn byudjet» baǵdarlamasy ayasynda kórkeıtílgen skverden bastaldy. Aumaǵy 3,89 gektar bolatyn jobany audan tūrǵyndary ūsynǵan. Jūmys barysynda 4,5 myń sharshy metrden astam kespe tas tóseldí, 8,5 myń sharshy metr aumaq kógaldandyryldy, 550 būta jáne 30 aǵash otyrǵyzyldy. Sondaı-aq avtosuaru júıesí, 83 jaryqtandyru tíregí, 45 qoqys jáshígí jáne 24 beınebaqylau kamerasy ornatyldy. Oryndyqtar men oıyn alańdarynyń bír bólígí qaıta qalpyna keltíríldí.
Būdan keıín qala ákímí 4-shaǵynaudanda ornalasqan «Saryarqa» bazarynyń qaıta jańǵyrtylu barysymen tanysty. Jūmys «Market Plaza» JShS-níń 1,5 mlrd teńge jeke ınvestıtsıyasy esebínen júrgízílude. 2025 jyldyń jeltoqsanynda ayaqtaluy josparlanǵan joba nátıjesínde 0,84 gektar aumaqta zamanauı sauda keshení ashylyp, jūmys oryndarynyń sany 250-ge deıín artady.
Sapar barysynda Darhan Satybaldy №2 Qalalyq balalar klınıkalyq auruhanasyna bardy. Mūnda eskí korpus súrílíp, 67 tósek-orynǵa arnalǵan jańa ǵımarattyń qūrylysy josparlanǵan. Qūrylys-montaj jūmysy 2025 jyldyń qarashasynda bastalyp, 2027 jyldyń aqpanynda ayaqtaluǵa tıís.
«Densaulyq saqtau salasyn damytuǵa erekshe kóńíl bólíp otyrmyz. Qūrylystyń sapasy men merzímín qatań saqtau mańyzdy», – dedí qala ákímí.
Sapar sońynda Darhan Satybaldy Altynsarın dańǵyly, 1 mekenjaıyndaǵy kógaldandyru obektílerín jáne Qabdolov kóshesí, 6 boıyndaǵy kórkeıtílgen aumaqty qarady. Būl nysandar da «Halyq qatysatyn byudjet» baǵdarlamasy ayasynda júzege asqan jáne búgínde tolyq ayaqtalǵan. Mūnda zamanauı jaryqtandyru, oryndyqtar, qoqys jáshíkterí, balalar oıyn alańdary men beınebaqylau júıelerí ornatylǵan.
Qala ákímí jobalardy tūrǵyndar sūranysyn eskere otyryp júzege asyrudyń mańyzdylyǵyn atap óttí. Sonymen qatar kórkeıtílgen aumaqtardy tıístí deńgeıde kútíp ūstaudy jáne qalada bíryńǵaı sáulettík stıldí saqtau – jasyl jelek, kóshedegí shaǵyn arhıtekturalyq nysandar jáne jaryqtandyru elementteríne deıín bírízdendírudí tapsyrdy.