Óńirlik komýnıkasıalar qyzmetiniń baspasóz alańynda Lázzat Jylqybaeva aýdan aýmaǵynda qolǵa alynǵan abattandyrý jumysy jóninde baıandady. Ákimniń aıtýynsha, bıyl aýdan aýmaǵynda turǵyndardyń jaılylyǵy men ekologıalyq teńdigin arttyrýǵa baǵyttalǵan aýqymdy jumys qolǵa alynǵan.
Jyl basynan beri birneshe iri nysan jańartylyp, kórkeıtildi. Seıfýllın, Nazarbaev pen Abylaı han dańǵylynyń boıyndaǵy bos aımaqtardy abattandyrý aıaqtalyp qaldy. Kemel yqshamaýdanynda Qarasý ózeni boıyndaǵy jaǵalaýǵa kúrdeli jóndeý júrgizilip jatyr. Munda uzyndyǵy 1,5 shaqyrym bolatyn serýendeıtin aımaq ashylady. Aınabulaq yqshamaýdanynda jaıaý júrginshiler Arbaty jóndelse, Qulagerde 83 kópqabatty úıdi qamtıtyn 28 aýla jańartyldy.
Abattandyrýdyń mańyzdy bóligi – «Halyq qatysatyn búdjet» baǵdarlamasy aıasynda júzege asqan jobalar. Turǵyndardyń bastamasymen 2 mıllıard teńgege 30 joba qolǵa alyndy. Onyń ishinde jaǵalaýlar men saıabaqtardy abattandyrý, balalar men sport alańdaryn ornatý, serýen aımaqtaryn qurý, kógaldandyrý men avtosýarý júıelerin engizý bar. Sonymen qatar Almaty – Óskemen jolynyń boıyna shýdy oqshaýlaıtyn qalqandar ornatylyp, batpaqty aýmaqtar retke keltirildi.
Qazirgi ýaqytta bes jańa jobanyń jobalyq qujattamasy ázirlenip jatyr. Olardyń qatarynda Palladın kóshesindegi 8,3 gektar aýmaqty qamtıtyn jasyl aımaqty jańǵyrtý men 2 gektarlyq Kókmaısa saıabaǵyn qaıta jańartý bar. Sondaı-aq 48 aýlany jańartý boıynsha jobalyq qujat daıyn – onda gabıondar, jaryqtandyrý júıeleri, balalar men sport alańdary jáne shaǵyn sáýlet nysandary ornatylady.
«Qolǵa alynǵan barlyq sharýanyń maqsaty – turǵyndarǵa qolaıly, zamanǵa saı jáne ekologıalyq taza qalalyq orta qalyptastyrý. Ár adam óz aýdanynda ómir súrip, demalyp, otbasymen ýaqyt ótkizýge jaıly jaǵdaı jasalǵanyn sezinýi tıis», – deıdi aýdan ákimi Lázzat Jylqybaeva.