2023 jyly shahar ekonomıkasy 4,4%-ke ósedi.
Osy jyldyń 11 aıynda Almatyǵa 1,2 trln teńgeden astam ınvestısıa tartylǵan. Bul týraly Almaty ákimi Erbolat Dosaev Qazaqstan Prezıdenti Qasym-Jomar Toqaevtyń qatysyýymen ótken Úkimet otyrysynda aıtty, dep habaraıdy Almaty-akshamy.kz.
«Almaty turǵyndarynyń ómir súrý sapasyn odan ári jaqsartý jáne áleýmettik, ınjenerlik, kólik ınfraqurylymyna qatysty júıeli máselelerdi sheshý úshin osy jyldyń qyrkúıek aıynda «Almaty qalasyn 2025 jylǵa deıin damytý baǵdarlamasy jáne 2030 jylǵa deıingi orta merzimdi perspektıvalar» bekitildi. Sizdiń belsendi qoldaý kórsetýińizdiń jáne qala ákimdigi qabyldaǵan sharalardyń arqasynda bıylǵy jyldyń 11 aıynda qysqa merzimdi ekonomıkalyq ındıkator 6,2%-ke deıin jedeldep, óńirler arasynda aldyńǵy pozısıany qamtamasyz etti.Óńdeý ónerkásibi ósý draıverine aınalyp, ósý qarqyny boıynsha elde 1-shi orynǵa shyqty (+14,8%)», - dedi Erbolat Dosaev óz sózinde.
Onyń aıtýynsha, jeke ınvestısıalardyń 16%-ke ósýimen ınvestısıalyq belsendiliktiń joǵary deńgeıi qamtamasyz etildi. Osy jyldyń 11 aıynda barlyǵy 1,2 trln. teńgeden astam ınvestısıa (1248 mlrd.) tartyldy.
«Bıylǵy jyldyń basynan bastap belsendi jumys isteıtin shaǵyn jáne orta bıznes sýbektileriniń sany 38,5%-ke (285,6 myńǵa deıin) ósti. Shaǵyn jáne orta bıznestiń 2,1 myń jobasyna (94 mlrd. teńge) qoldaý kórsetýdiń arqasynda 55,7 myń jumys orny quryldy, onyń 70%-i turaqty jumys oryndary. Bul jumyssyzdyq deńgeıin 5,0%-ke deıin tómendetýge múmkindik berdi.Bizdiń boljamymyz boıynsha joǵaryda atalǵan sharalar Almaty ekonomıkasynyń 2022 jyly 5,0%-ke deıin ósýin qamtamasyz etedi», - dedi qala ákimi.
2023 jyly ákimdiktiń negizgi mindeti Almaty qalasynyń damý baǵdarlamasyna sáıkes ekonomıkanyń turaqty naǵaıýyn qamtamasyz etý bolmaq.
«Bul rette, joǵary tehnologıalyq jáne «taza» óndiristerdi, týrızmdi, IT-sektordy jáne kreatıvti ındýstrıalardy damytýǵa basa nazar aýdarylatyn bolady. Qala ekonomıkasyn odan ári ártaraptandyrý úshin Siz Almaty ındýstrıalyq aımaǵynyń aýmaǵyn 189 gektarǵa keńeıtý máselesin qoldadyńyz. 7 shaǵyn ónerkásip parkin iske qosý, kreatıvti ındýstrıalardyń venchýrlyq qoryn qurý, 40 mlrd. teńge somasyna basym baǵyttardaǵy 2,6 myńǵa jýyq jobany qarjylandyrý josparlanǵan. Jalpy, 1,5 trln. teńge ınvestısıa tartylady. Osynyń arqasynda 2023 jyly Almaty qalasynyń ekonomıkasy 4,4%-ke ósedi», - dedi Erbolat Dosaev.