Almaty ákimi Darhan Satybaldy jumys sapary barysynda qala turǵyndary men qonaqtaryna arnalǵan jańa qoǵamdyq keńistiktiń abattandyrylý jumystaryn kórip qaıtty.
Jańa saıabaq Jarokov pen Sı Sınhaı kósheleriniń qıylysynda, «Ońtústik» saıabaǵynyń soltústiginde ornalasqan. Jalpy aýmaǵy 4,1 gektar.
Qazirgi tańda aýmaqta jaıaý júrginshilerge arnalǵan joldar tóselip, balalarǵa oınaýǵa yńǵaıly alańqaılar ornatylyp, jaryqtandyrý júıesi men shaǵyn sáýlettik elementter qoıylyp jatyr. Kógaldandyrýǵa erekshe kóńil bólinip, 120-dan astam iri aǵash, atap aıtqanda jóke, talshyn jáne qaraǵaı otyrǵyzý kózdelgen. Jańa saıabaq almatylyqtardyń tynyǵyp, serýendeıtin zamanaýı ári jaıly mekenine aınalmaq.
Merdiger uıymdardyń ókilderine qarata sóılegen qala ákimi atqarylatyn istiń merzimi men sapasyn buljytpaı oryndaýdyń mańyzdylyǵyn atap ótti:
«Merdigerlerge naqty tapsyrma berildi, qurylys belgilengen ýaqytta ári tıisti deńgeıde aıaqtalýǵa tıis. Qala turǵyndaryna sapaly jumys kerek, biz merzimniń sozylyp ketýine nemese atústi jasaýǵa jol bermeımiz. Eger tártip buzýshylyqtar anyqtalsa, qatań sharalar qoldanamyz», — dedi Darhan Satybaldy.
Ol jobany jaýapsyz oryndaǵan jaǵdaıda oryndaýshylardyń jeke jaýapkershiligi bar ekenin de eske saldy. Qala basshysynyń tapsyrmasy boıynsha qurylys jumystaryn úsh aı ishinde tolyq aıaqtaý josparlanyp otyr.