Búkil álemde 1 qazanda Qarttar kúni atap ótiledi. Almaty qalasy áleýmettik ál-aýqat basqarmasy basshysynyń orynbasary mindetin atqarýshy Jánibek Qarataev Óńirlik komýnıkasıalar qyzmeti alańynda qalada qart adamdarǵa qandaı qamqorlyq kórsetip jatqanyn aıtyp berdi, dep habarlaıdy almaty-akshamy.kz
Jánibek Qarataev atap ótkendeı, qart adamdar barlyq keıingi urpaq úshin baǵdar bolyp tabylady.
«Bul kún bizge aǵa býynnyń taǵdyry týraly oılanýǵa, el men qalamyzdyń damýyna úlken úles qosqan adamdarǵa óz rızashylyǵymyz ben súıispenshiligimizdi bildirýge múmkindik beredi. Qarttar kúni – bul jas týraly eske salý emes, jas urpaqty tárbıelegeni, qajyrly eńbegi úshin ortaq alǵys bildirý kúni», - dep atap ótti ákimdik ókili.
Áleýmettik ál-aýqat basqarmasy basshysynyń orynbasary Almaty ákimdigi egde jastaǵy azamattarǵa tolyqqandy ómir saltyn júrgizýge múmkindik beretin jaǵdaılar jasaý boıynsha birqatar sharalar qabyldap jatqanyn habarlady.
Qazir Almatyda shamamen 231 myń zeınetker nemese olar qala halqynyń 11,5% quraıdy. Jyl saıyn qalalyq búdjetten materıaldyq jáne áleýmettik qoldaý kórsetýge qomaqty qarajat bólinedi.
Jánibek Qarataev qalada muqtaj otbasylarǵa áleýmettik tólemderdiń 17 túri kórsetiletinin habarlady. Zeınetkerlerge, onyń ishinde Uly Otan soǵysynyń ardagerlerine, tyl eńbekkerlerine Jeńis kúnine oraı tólemder júzege asyrylady jáne komýnaldyq qyzmetter úshin shyǵyndar óteledi. Budan basqa, sýdy, gazdy esepke alý aspaptaryn jáne gaz jabdyǵyn ornatý shyǵyndary óteledi. Jasy boıynsha zeınetkerlerge bazalyq zeınetaqyny eseptemegende, 25% tólemmen sanatorlyq-kýrorttyq emdeý qyzmeti usynylady.
«Áleýmettik tólemder ótinish negizinde jáne belgili bir ólshemderdi eskere otyryp kórsetiledi. Mysaly, Jeńis kúnine oraı 16 800 ardagerge 1,2 mlrd teńge somasynda materıaldyq kómek kórsetildi, 150 myńǵa jýyq zeınetkerdiń komýnaldyq shyǵystaryna tólemder bólindi, 1 600-den astam qala turǵyndaryna turǵyn úı kómegi kórsetildi», - dedi Jánibek Qarataev.
Sońynda basqarma ókili jeke bastamasy boıynsha egde jastaǵy adamdarǵa kómektesetin almatylyqtarǵa, mesenattarǵa alǵysyn bildirdi. Ol Almatynyń qart turǵyndary kóńil aýdarýdy, qarapaıym adamdardyń qatysýyn qajet etetinin, al jergilikti atqarýshy organdar tarapynan qoldaý jan-jaqty kórsetiletinin atap ótti.