23 maýsym kúni Óńirlik komýnıkasıalar qyzmeti alańynda Sanıtarlyq-epıdemıologıalyq baqylaý departamentiniń basshysy Jandarbek Bekshın shuǵyl brıfıń ótkizdi. Ol megapolıs epıdemıologtary jańa mýtasıalardy anyqtaý úshin Almaty aýmaǵynda aınalymda júrgen koronavırýs shtamdaryna genetıkalyq zertteý júrgizilip jatqanyn habarlady.
Almatynyń Bas sanıtarlyq dárigeri Jandarbek Bekshın qalada aınalymdaǵy 90%-ǵa jýyq mýtasıalanǵan shtamdardyń taralýyna baılanysty qaladaǵy epıdemıologıalyq jaǵdaı kúrdeli ekenin aıtty.
«12-19 maýsym aralyǵynda mýtasıalanǵan shtamdardyń aınalymyn anyqtaý maqsatynda PTR-dıagnostıkasyn júrgizdik. 53 zertteýdiń ishinen brıtandyq shtamm 44-te (83%), ońtústikafrıkalyq shtamm eki jaǵdaıda (4%) jáne bireýinde Nú-ıork (1,8%) shtamy anyqtaldy. Qalǵan 11%-da COVID-19 vırýsynyń mýtasıasy anyqtalmady», – dedi J. Bekshın.
Sanıtarlyq-epıdemıologıalyq vedomstvo basshysynyń aıtýynsha, 16 maýsymnan bastap juqtyrý kórsetkishi 0,7-den 0,96-ǵa deıin ósken.
«Bul demalys oryndaryna barý men turǵyndardyń betperde rejımin saqtaý boıynsha epıdemıaǵa qarsy sharalardy elemeýi saldarynan boldy», – dedi J. Bekshın.
Sondaı-aq COVID-19 aýrýynyń ósýiniń negizgi sebebi ınfeksıanyń tez taralýyna yqpal etetin mýtasıalanǵan shtamdardyń bolýyna baılanysty.
Sondyqtan 22 maýsymda epıdemıologıalyq jaǵdaıdy baǵalaý matrısasynda Almaty taǵy da «sary» aımaqqa ótti. Juqtyrý kórsetkishi joǵary.
Jandarbek Bekshın epıdemıologıalyq jaǵdaı ýshyqqan jaǵdaıda shekteý sharalaryn baqylaý 5 kún ishinde júrgiziletinin túsindirdi («jasyl» aımaqtan «saryǵa» nemese «sary» aımaqtan «qyzylǵa» kóshý). Sondyqtan Almatyda «jasyl» aımaq rejımi taǵy 5 kún, ıaǵnı 27 maýsymǵa deıin saqtalady.