Almatynyń Alataý aýdanynda Prezıdent tapsyrmasy boıynsha 11 500 orynǵa arnalǵan 6 mektep salynady
Bul týraly ÓKQ brıfıńinde Almatynyń halyq eń kóp qonystanǵan Alataý aýdanynyń ákimi Azamat Qaldybekov baıandady. Ol búgin mektep qurylysy «Jaıly mektep» ulttyq jobasy aıasynda júzege asyrylatynyn atap ótti, dep habarlaıdy almaty-akshamy.kz.
Jańa jaıly mektepter Terekti, Qarasý, Alǵabas, Aqbulaq, Samǵaý jáne Áıgerim shaǵyn aýdandarynda paıda bolady. Qurylysty júrgizý 2023-2024 jyldarǵa josparlanǵan.
A. Qaldybekovtyń málimetinshe, aýdanda barlyǵy 30 memlekettik mektep jáne 8 jekemenshik mektep bar. Barlyǵy 57 146 oqýshy oqıdy (memlekettik mektepterde – 55 751 oqýshy, jekemenshik mektepterde - 1395). Bul rette oqýshy oryndarynyń tapshylyǵy – 5725. Aýdandaǵy tapshylyqty azaıtý úshin mektepter salynýda. Saıaly-2 jáne Zerdeli shaǵyn aýdandarynda árqaısysy 550 oryndyq eki mekteptiń qurylysy júrgizilýde. Qurylys jumystaryn 2024 jyldyń sońyna deıin aıaqtaý josparlanýda.
Mektepke deıingi bilimge keletin bolsaq, aýdanda 20 memlekettik jáne 201 jekemenshik balabaqsha men shaǵyn ortalyqtar bar, olarǵa 19173 bala barady. Búgin Saıaly-2 shaǵyn aýdanynda 160 oryndyq balabaqshanyń qurylysy aıaqtaldy.
Budan bólek, Zerdeli shaǵyn aýdanynda jalpy aýdany 2 730 m2 bolatyn dene shynyqtyrý-saýyqtyrý kesheniniń qurylysy boıynsha jumystar aıaqtalýda. Aýdanda barlyǵy 184 sport ǵımaraty jumys isteıdi.
Sondaı-aq, Alataý aýdanynda 13 712 balanyń 534 úıirme men seksıalarǵa tegin qatysý múmkindigi bar. Olardyń qatarynda kınoteatr, kitaphanalar, aýla klýbtary, murajaı, teatr, tenıs ortalyǵy jáne t.b. bar.
Qorytyndylaı kele, Azamat Qaldybekov Memleket basshysynyń tapsyrmasy boıynsha «100 zamanaýı Oqýshylar saraıynyń qurylysy» baǵdarlamasyn júzege asyrý aıasynda aýdanda ınovasıalyq shyǵarmashylyq ortalyǵy ashylǵanyn, onda 33 túrli úıirme uıymdastyrylǵanyn, apta saıyn 5 myń balaǵa deıin qamtylyp otyrǵanyn habarlady.