Qytaı shekarasynda ornalasqan "Baqty" baqylaý-ótkizý pýnktinde jeke tulǵalardyń ótýine ýaqytsha shekteý qoıyldy. Bul jóninde memlekettik kirister komıtetiniń baspasóz qyzmeti málimdedi. dep habarlaıdy almaty-akshamy.kz.
10 qarashadan bastap Qazaqstan men Qytaı arasynda vızasyz rejım jumys isteı bastaǵan edi. Kelisimge sáıkes kórshi elde vızasyz 30 kúnge deıin júrýge bolady. Osyǵan baılanysty Qazaqstan-Qytaı ýchaskesindegi ótkizý pýnktterinde jeke tulǵalardyń ótý qarqyny kúsheıedi dep kútilýde.
Qazirgi ýaqytta memlekettik kirister komıteti Qazaqstan-Qytaı shekarasyndaǵy ótkizý pýnktterin jańǵyrtý jáne tehnıkalyq jaraqtandyrý boıynsha jumys júrgizip jatyr. Onyń ishinde Abaı oblysyndaǵy "Baqty" ótkizý pýnkti de bar.
“Qazir atalǵan pýnktte shekaradan ótý kelisilgen ýaqytsha tehnologıa boıynsha iske asyrylady. Sáıkesinshe, rekonstrýksıalaý ýaqytyn baqylaý barysynda jeke tulǵalardyń qaýipsizdigin qamtamasyz etý múmkindigi joq. Qos tarap azamattarynyń qaýipsizdigin qamtamasyz etý úshin bıyl 10 qarashadan bastap rekonstrýksıalaý kezeńinde Abaı oblysy "Baqty (Qazaqstan) – Pokıtý (QHR)" ótkizý pýnktinde jeke tulǵalardy ótkizýdi ýaqytsha toqtatady”, - delingen habarlamada.
Shyǵys Qazaqstan oblysynyń Maıqapshaǵaı (Qazaqstan) – Zımýnaı (QHR), Jetisý oblysy "Alakól (Qazaqstan) – Alashankoý (QHR)", Nur joly (Qazaqstan) – Qorǵas (QHR)", Almaty oblysynyń "Qaljat (Qazaqstan) – Dýlaty (QHR)" ótkizý pýnktterinde jeke tulǵalar shtattyq rejımde ótedi.
Komıtet málimetinshe qaýipsizdikti qamtamasyz etý úshin jeke tulǵalar tek joǵaryda atalǵan ótkizý pýnktteri arqyly ǵana Qytaıǵa óte alady.