Almaty qalasynyń Alataý aýdanynda jol-kólik ınfraqurylymyn damytý maqsatynda 60 kóshedegi joldarǵa jóndeý jumystary júrgizilýde. Josparlanǵan 23 myń sharshy metrden 15 myń sharshy metr jol jabyny jóndeldi. Bul týraly ÓKQ brıfıńinde Almaty qalasy Alataý aýdanynyń ákimi Azamat Qaldybekov málimdedi, dep habarlaıdy almaty-akshamy.kz
Esterińizge sala keteıik, 1 sáýirden bastap Almatydaǵy aýdan ákimdikteri ózderine senip tapsyrylǵan aýmaqtardaǵy kóptegen is-sharalardy derbes qarjylandyrady. Qazaqstanda jergilikti ózin-ózi basqarýdy ortalyqsyzdandyrý Prezıdent Qasym-Jomart Toqaevtyń tapsyrmasyna sáıkes júrgiziledi.
Búginde aýdanda 7 shaǵyn aýdandaǵy joldarǵa ortasha jóndeý jumystary júrgizilýde jáne uzyndyǵy 61 km bolatyn F.Ońǵarsynova men N. Danchenko atyndaǵy eki úlken kóshede jańa joldardyń qurylysy júrgizilýde.
Sondaı-aq, ákim ortasha jóndeý jumystary aıaqtalǵan shaǵyn aýdandardy atap ótti, olar: Tomırıs, Qarasý, Alǵabas, Terekti, Aqbulaq jáne Zerdeli. Saıyn kóshesin Rysqulov dańǵylynan Móńke bıge deıin uzartý júrgizilýde, uzyndyǵy 3,2 km. Odan bólek, Saıyn men Móńke bı kósheleriniń qıylysynda tolyq bede túrinde jolaıryq salý jumystary júrgizilýde.
Sonymen qatar, bes jerasty jaıaý júrginshiler ótkelinde tas tóseýishter men taktıldi plıtalar ishinara aýystyryldy, tóbelerge sofıtter, vandalızmge qarsy jaryqtandyrý qurylǵylary, mýzykalyq jabdyqtar jáne beınebaqylaý júıesi (Raıymbek dańǵyly, Momyshuly kóshesiniń qıylysy - 3 jerasty ótkeli; Momyshuly kóshesi Raıymbek dańǵylynan joǵary - 1 ótkel; Raıymbek dańǵyly Aqkent shaǵyn aýdanynan burylys – 1 ótkel) ornatyldy.
«18 jaıaý júrginshiler ótkeline kúrdeli jóndeý jumystary júrgizilýde, onda syrtqy jaryqtandyrý shamdaryn aýystyrý, kótergish mehanızmder men elektr jetegi bar lıftterdi kúrdeli jóndeý, beınebaqylaý ornatý, arbamen jáne velosıpedpen túsetin oryndardy ornatý, irgeles aýmaqty kógaldandyrý jáne abattandyrý qarastyrylǵan», - degen aýdan basshysy kúrdeli jóndeý jumystary bıylǵy jyl sońyna deıin aıaqtalatynyn aıtty.
Aýdan basshysy óz sózinde trotýarlardyń qurylysyna erekshe nazar aýdarylǵanyn atap ótti. Búgingi tańda jalpy aýdany 27 050 sh. m bolatyn 8 shaǵyn aýdanda tehnıkalyq trotýar salý jumystary júrgizilýde.
«Trotýarlardyń qurylysy turǵyndar «kozá tropa» dep atalatyn jasyl aımaqtarda júzege asyrylady, bul shańnyń kóterilýine ákeledi, jer erozıasy paıda bolady jáne sýarý júıesi jabdyqtalǵan jerlerde jabdyqtar zaqymdalady», - dep túsindirdi A.Qaldybekov.
Aýdan basshysy ınjenerlik ınfraqurylymdy damytý jáne qalpyna keltirý máselelerine de toqtaldy. Máselen, jalpy uzyndyǵy 306,9 km bolatyn segiz shaǵyn aýdanda qurylys-montajdaý jumystary josparlanýda. Bıyl barlyǵy Alǵabas 3-kezek, Shapaǵat, Bolashaq, Rahat-Mádenıet jáne Ójet sıaqty bes shaǵyn aýdanda qurylys-montajdaý jumystary bastaldy.