2025 jyly Almatynyń Medeý aýdanynda «Halyq qatysatyn búdjet» baǵdarlamasy aıasynda 34 joba iske asyrylýda. Onyń 17-si aýlany abattandyrýǵa, 13-i qoǵamdyq keńistikti jańartýǵa, al taǵy 4 joba avtomatty sýarý júıesin ornatýǵa baǵyttalǵan. Bul týraly Medeý aýdany ákimdigi habarlady.
Baǵdarlama aıasynda júzege asqan jobanyń biri Áıteke bı kóshesi, 28 mekenjaıyndaǵy aýla. Munda zamanaýı jaryq júıesi júrgizilip, jıektas tóseldi, kógal egildi, oryndyq pen qoqys jáshikteri qoıylǵan demalys aımaǵy jasaldy. Sondaı-aq, balalar men jastarǵa arnalǵan vorkaýt-alańdar quryldy.
Turǵyndardyń aıtýynsha, bul ózgeristerdiń arqasynda balalar alańsyz oınap, qaýipsizdigi arta túsken. №28 úı turǵyny Elena bylaı dedi:
«Burynǵy aýlanyń qandaı bolǵanyn bilemin, qazir múlde ózgergen. Árıne, jańa aýla áldeqaıda jaqsy, balalarǵa unaıdy. Kúnde olardyń oınap júrgenin kóremin. Jaqsy boldy. Eń bastysy, turǵyndardyń ózi abattandyrýǵa qatysa alady. Sebebi, biz ózimizge qandaı alań qajet ekenin jaqsy bilemiz. Ásirese, balalarǵa arnalǵan jumsaq jabyn qatty unady, qulap qalǵan jaǵdaıda da qatty qaýip joq».
Aıta keteıik, sońǵy jyldary Almatyda «Halyq qatysatyn búdjet» baǵdarlamasy sátti damyp keledi. Ol qala turǵyndaryna ómir súrý sapasyn jaqsartatyn jobalardy tikeleı usynýǵa jáne júzege asyrýǵa múmkindik beredi.
Qazir atalǵan baǵdarlamaǵa ótinim qabyldaý jalǵasyp otyr. Ideıańyzdy 30 qyrkúıekke deıin www.budget.open-almaty.kz saıty arqyly joldaýǵa bolady.