Bıyl 7–10 tamyz aralyǵynda Almaty qalasynda uly qazaq aqyny, oıshyly jáne aǵartýshysy Abaı Qunanbaıulynyń 180 jyldyq mereıtoıyna arnalǵan onlaın-chellendj ótýde. Bul bastama Abaıdyń ádebı jáne fılosofıalyq murasyn keń aýdıtorıaǵa nasıhattaýǵa baǵyttalǵan.
Chellendjdiń maqsaty — qazaqstandyqtardy mańyzdy datamen quttyqtap, aqyn shyǵarmalarynda kórinis tapqan rýhanı qundylyqtardy qaıta zerdeleýge jáne olardy keńinen taratýǵa shabyt berý.
Onlaın-chellendjge qazirdiń ózinde kóptegen adamdar qosyldy. Olardyń qatarynda mádenıet, sport, ǵylym, bilim berý, jastar uıymdary, saıası partıalar ókilderi, Májilis depýtattary, Qazaqstan halqy Assambleıasynyń músheleri, sondaı-aq óner, medıa jáne qoǵam qaıratkerleri bar. Atap aıtqanda: Óktem Altaev, Asqat Tarǵyn, Jubanysh Jeksenuly, Maqsat Bazarbaev, Saıat Nurǵazın, Dáýren Baıbóri, Marta Tólepbergen, Gýsman Kyrgyzbaev jáne taǵy basqalar.
Máselen, Qazaqstandyq dzúdoshy, 2024 jylǵy jazǵy Olımpıada oıyndarynyń qola júldegeri Gýsman Kyrgyzbaev óz vıdeoquttyqtaýynda Abaıdyń «Senbe jurtqa, tursa da qansha maqtap» atty óleńinen úzindi oqydy.
Qazaqstannyń eńbek sińirgen qaıratkeri, qazaq estradasynyń jaryq juldyzy Jubanysh Jeksenuly Abaıdyń «Qarańǵy túnde taý qalǵyp» atty shyǵarmasyn oryndap, estafetany tanymal ánshi Maqsat Bazarbaevqa joldady. Óz kezeginde ol «Kózimniń qarasy» áninen úzindi oryndady.
Chellendj keńinen taralyp, úlken mádenı qozǵalysqa aınalýda. Bul qozǵalys qazaqstandyqtardy Abaı ustanǵan — bilimge umtylý, ádildik, adamgershilik jáne ózin-ózi damytý sıaqty máńgilik qundylyqtar tóńireginde biriktirýde.
Kez kelgen adam Abaıdyń óleńderinen, «Qara sózderinen» nemese basqa shyǵarmalarynan úzindi oqyp, qysqa vıdeoquttyqtaý jaza alady. Beınerolık sońynda qatysýshylar chellendjdi dostaryna, áriptesterine, tanystaryna jáne jazylýshylaryna joldap, olardy aksıaǵa qosylýǵa shaqyrady.
Daıyn vıdeolar TikTok, Instagram, Facebook jáne Threads áleýmettik jelilerinde #Abaı180jyl jáne #Abai180 heshtegterimen jarıalanady.