Sesıa aıasynda depýtattar birqatar mańyzdy sheshimdi qarap, qoldady. Sonyń ishinde qalany basqarýdyń jańartylǵan sqemasy bekitildi. Ózgerister ákimshilik qurylymnyń tıimdiligin arttyrýǵa jáne Úkimet bekitken bazalyq qurylymǵa sáıkestendirýge baǵyttalǵan. Atap aıtqanda:
- ekonomıka basqarmasy men Qarjy basqarmasy biriktirilip, Ekonomıka jáne qarjy basqarmasy bolyp quryldy;
- qoǵamdyq damý basqarmasy İshki saıasat basqarmasy bolyp qaıta ataldy;
- qalalyq josparlaý jáne ýrbanıstıka basqarmasy Sáýlet jáne qala qurylysy basqarmasy bolyp ózgertildi;
- seısmıkalyq qaýipsizdik jáne mobılızasıalyq daıyndyq basqarmasy Mobılızasıalyq daıyndyq, aýmaqtyq jáne azamattyq qorǵanys basqarmasy bolyp qaıta quryldy;
- komýnaldyq ınfraqurylymdy damytý basqarmasy Komýnaldyq ınfraqurylym jáne turǵyn úı ınspeksıasy basqarmasy bolyp ataldy.
Jol-kólik salasyn qaıta uıymdastyrýǵa erekshe nazar aýdaryldy. Qalalyq mobıldilik basqarmasy eki derbes organǵa bólinedi. Olar:
- jol qozǵalysyn uıymdastyrý jáne jolaýshylar kóligi basqarmasy – qoǵamdyq kólikti, parkıng keńistigin, baǵdarsham nysandaryn, jol tańbalary men belgilerin retteý fýnksıalaryn oryndaıdy;
- jol ınfraqurylymyn damytý basqarmasy – jol jelisin, kólik toraby nysandaryn (TPÝ), metro, LRT, BRT jáne aıaldama keshenderin salý men damytýǵa jaýapty.
Barlyq ózgeris Úkimet bekitken qala ákimdigi apparatynyń shtat sanyn saqtaý aıasynda, ishki qaıta bólýler arqyly búdjetten qosymsha shyǵynsyz júzege asyrylady.
Sonymen qatar depýtattar Qazaqstan Respýblıkasynyń jańartylǵan Sý kodeksine sáıkes ázirlengen Almaty qalasynda jalpy sý paıdalaný qaǵıdalaryn bekitti. Qujat turǵyndardyń sý aıdyndaryna erkin qol jetkizýin, qorshaǵan ortany qorǵaýdy jáne sanıtarlyq talaptardyń oryndalýyn qamtamasyz etýge baǵyttalǵan. Jergilikti deńgeıde alǵash ret ortaq sý aıdyndarynda azamattardyń demalys, balyq aýlaý jáne týrızmmen aınalysý quqyǵyn kepildendiretin jarıa sý servıtýty qaǵıdaty bekitildi.
Basqa da sheshimderdiń qatarynda depýtattar Almaty qalasynda adam saýdasyna qarsy is-qımyl jónindegi komısıa týraly erejeni kelisip, sondaı-aq qala ákimdigi janyndaǵy terorızmge qarsy komısıanyń konsýltatıvtik-keńesshi organynyń quramyna ózgerister engizdi.
Sesıa sońynda depýtattar Altaı Berdiqulovty Almaty qalasy boıynsha Revızıalyq komısıa Tóraǵasy laýazymynan bosatý týraly sheshim qabyldady. Ýaqytsha mindetti komısıa múshesi Danıar Tórkeshov atqaratyn boldy.