Bıznes-jobany súıemeldeýge Qoldaý kásipkerlik ortalyǵynan kómek berilgen.
«BJK-2025» baǵdarlamasy aıasynda Almaty qalasynyń turǵyny Bıbigúl Nurbekova 2 mln teńge kóleminde ınovasıalyq grant utyp aldy, dep habarlaıdy Almaty-akshamy.kz Almaty.tv kanalyna silteme jasap.
Jeke kásipker memleketten alynǵan qarajatqa tigin mashınalary men shıkizat – satylar, dóńgelekter, beldikter jáne basqa da buıymdardy tigý úshin teri satyp aldy.
Grant ıegeriniń aıtýynsha, qolóner bıznesi oǵan mura bolyp qalǵan. Nurbekovter otbasy ulttyq buıymdar jasaýmen aınalysyp otyrǵan tórtinshi urpaq.
«Biz úlken otbasymyz, baýyrlarym, olardyń áıelderi, jıenderim osy bıznestiń esebinen ómir súredi. Barlyq úlkendi-kishileriniń bári. Bul óte aýyr, qolmen jasalatyn jumys. Aldymen biz bolashaq er-toqymnyń negizin aǵashtan kesip alamyz, terini ózimiz óńdeımiz, ony ıleımiz. Metal bólshekterin dánekerleý arqyly daıyndaımyz», – deıdi Bıbigúl Nurbekova.
Qolónershiniń aıtýynsha, bir er-toqymdy jasaý keıde úsh kúnge deıin sozylady eken.
«Er-toqymnyń quny 25 myńnan mıllıon teńgege deıin ózgeredi. Altyn, kúmis jáne qymbat metaldarmen qaptalǵan taza bylǵarydan jasalǵan eń qymbat er-toqymdarǵa asyl tuqymdy jylqylardyń ıeleri tapsyrys beredi. Tapsyrystar Qazaqstannyń barlyq aımaqtarynan, sondaı-aq, Ázirbaıjannan, Armenıadan, Qytaıdan, Mońǵolıadan keledi», -deıdi kásipker.