Qyrkúıekte ashylatyn teatr 3 jańa spektákldi sahnalaıdy. Soǵan sáıkes óner ordasynyń tehnıkalyq, quramdyq jáne repertýarlyq jospary sarapqa túsip, jıynda jańa ártister de tanystyryldy.
Almatydaǵy «Alataý» dástúrli óner teatry kórermenine esigin qaıtadan aıqara ashpaq. Búgin jýyrda bastalatyn jańa maýsymǵa daıyndyq jumystary jolǵa qoıyldy, dep habarlaıdy Almaty-akshamy.kz Almaty.tv kanalyna silteme jasap.
«Aryq sóılep, semiz shyq deıdi ǵoı. Sol aıtqandaı, josparlarymyz bar. Jańadan kóptegen mamandar, jastar alynyp jatyr. Endi bárin jumys barysy kórsetedi. Qazir sol, daıyndyǵymyzdy bastadyq», – dedi «Alataý» dástúrli óner teatrynyń kórkemdik jetekshisi Juldyzbek Jumanbaı.
«Alataý» dástúrli óner teatry qyrkúıek-qazan aıynda Túrkıaǵa gastróldik saparmen barady. Baýyrlas elden arnaıy shaqyrtý alǵan mamandar daıyndyqty búginnen bastaımyz dep otyr. Sonymen qatar, bul maýsymda teatrdyń dekoratıvtik sheberhanasy da ashylady.
«Aldaǵy jańa maýsymda bizde kóptegen jańa shyǵarmashylyq jobalar bar. Onyń arasynda vıolenchel men teatrdaǵy halyq aspaptaryn qosyp, ulttyq áýendi jelige shyǵarý. Eń bastapqysy, osy maýsymda kóptegen mýzykalyq aspaptar alyp berip jatyr», – dedi mýzykant Baǵjan Oktábr.