Búgin – Halyqaralyq qarttar kúni. Halyqaralyq qarttar kúnine oraı megapolıstegi 28 panfılovshy-gvardıashy atyndaǵy saıabaqqa jınalǵan zeınetkerler men ardagerlerdiń qurmetine konsert uıymdastyryldy. Jas ónerpazdarmen birge qarıalardyń ózderi de án salyp, bı bıledi.
Salaýatty ómir saltyn ustanatyn sergek qarttar skandınavıalyq júris sportyna qýana qatysty.
Merekege bólengen park ishinde saýda núkteleri de jumys istep turdy. Oǵan qaladaǵy «Belsendi uzaq ómir súrý» ortalyqtarynda tirkelgen zeınetkerlerdiń óz qolynan shyqqan túrli qolóner, toqyma buıymdary jáne kartınalar qoıyldy.
"Uzaq jyl ustazdyq ettim, balalarǵa aǵylshyn tilinen sabaq berdim. Bilimdi urpaq tárbıeleýge úles qostym. Qazir zeınetkermin. Balalar jumysta, nemereler sabaqta, balabaqshada. Úıde qarap otyrmaımyn dep, Medeý aýdandyq Belsendi uzaq ómir súrý ortalyǵyna tirkelgen edim. Munda ózimdi jańa qyrynan ashtym desem de bolady. Sýretke bala kúnimnen jaqyn edim. Biraq ýaqyt aǵymymen basqa baǵytqa kettim. Al qazir shyǵarmashylyq áleýetim artyp, qylqalamdy serik etip, sýretter sala bastadym. Meniń osylaı ekinshi tynysymnyń ashylýyna dáneker bolǵan, bizge sýret úıirmesinen sabaq beretin Qazaqstan Sýretshiler odaǵynyń múshesi, belgili otandyq sýretshi Gúljamal Tagenovaǵa alǵysym sheksiz. San boıaýdy qalaı oınatýdy úıretti. Júregimnen shyqqan kishkentaı ǵana kartınalarym maǵan qýanysh, shabyt syılaıdy. Týǵan-týys, dos-jaranǵa da týǵan kúnderinde syılap qýantý bir mártebe. Kúni keshe úsh jasar nemereme balabaqshasyna bireýin berip jiberdim. «Kúzgi bal» konserttik baǵdarlamalarynyń bir qajetine jaraǵanynyń ózi maǵan taǵy da shabyt qosady", – deıdi zeınetker-ustaz Mavjýda Shómekeeva.
Qarttar merekesine «Almaty jas dárigerleriniń asosıasıasy» qoǵamdyq birlestigi qoldaý bildirdi. Sóıtip jas býyn ózderine úlgi tutar aǵa býyndy árqashan syılaıtynyn, qurmetteıtinin kórsetti.
Al Medeý aýdandyq «Belsendi ómir súrý ortalyǵynyń» úılestirýshisi Baqtıar Kamalov mundaı is-sharalardyń jylda bir aı boıyna uıymdastyrylatynyn atap ótti.
"Búginde Almatyda Belsendi uzaq ómir ortalyqtary sátti jumys isteýde. Bul jobanyń maqsaty – uzaq jyldar jumys istep, eńbeginiń zeınetin kóretin jasqa jetip, zeınet demalysyna shyqqan aǵa býynǵa qoldaý kórsetý, olardyń ózin qoǵamǵa áli de kerek ekenin sezinýine jaǵdaı jasaý, ómir súrý sapasyn arttyratyn zıatkerlik, mádenı-rýhanı shyǵarmashylyq, qoǵamdyq is-sharalarǵa keńinen tartý jáne urpaqtar sabaqtastyǵyn jalǵap otyrý úshin jas býynmen kezdesýler uıymdastyrý. Mine, búgin de sondaı bir taǵylymdy keshtiń kýási boldyńyzdar. Kúnniń jańbyrly bolǵanyna qaramaı kóptep jınalǵan, óz ómirin ózi jaryq sátterge toltyryp júrgen zeınetker-ardagerlerge alǵys aıtamyz", – deıdi Baqtıar Kamalov.
Taqyrypqa oraı aıta ketsek, Almaty – elimizdegi «Belsendi uzaq ómir súrý» ortalyǵy birinshi bolyp ashylǵan tuńǵysh qala. Búginde qanatyn keńge jaıyp, shahardyń barlyq aýdanynda jumys istep tur. Atalǵan ortalyqtarǵa keletin zeınetkerlerdiń kóbi eshteńe de kesh emes dep til úırenip, kompúterlik saýattylyqty meńgerýdi. Negizi, egde jastaǵy almatylyqtar arasynda «Aıkýne» ulttyq jattyǵýlary, keskindeme kýrstary, hor, qolóner jáne agroterapıa erekshe tanymal deıdi úılestirýshi-mamandar.