Megapolıstegi №7 qalalyq klınıkalyq aýrýhananyń ortohırýrgıa bólimshesinde zamanaýı artroskopıa ádisimen kúrdeli ota jasaldy, dep habarlaıdy aýrýhananyń baspasóz qyzmeti.
Bólimshe meńgerýshisi Arnat Baızaqovtyń aıtýynsha, artroskopıa kishigirim tilikter arqyly shaǵyn ınvazıvti ota jasaýǵa múmkindik beredi. Sony tehnologıa arqasynda býynnyń búlingen bólikterin qatty zaqymdamaı qalpyna keltirýge bolady. Ári mundaı ádispen jasalǵan otadan keıin naýqas densaýlyǵyn qalpyna keltirý merzimi de qysqarady.
19 jastaǵy pasıent bir jarym jyl buryn qulap, ıyǵyn jaraqattap alǵan. Konservatıvti emnen nátıje bolmaǵan, biraq jas jigit ortohırýrgterdiń kómegine júginýge asyqpapty. Saldarynan jigittiń ıyǵy osy ýaqyt ishinde 13 ret shyǵyp úlgergen.
«Dıagnostıka barysynda naýqastyń ıyǵy shyǵyp, ıyqtaǵy súıektiń basy synǵany, jaýyryn men býyn erneýi zaqymdanǵany anyqtaldy. Ádette mundaı dıagnoz qoıylǵan jaǵdaıda operasıa ashyq ádispen jasalady. Biraq syrqattyń anamnezin, jasyn, sportpen shuǵyldanatynyn eskere otyryp, shaǵyn ınvazıvti tehnıkany qoldaný týraly sheshim qabyldandy», – dep atap ótti Arnat Baızaqov.
Hırýrgter birden eki operasıa jasady. Birinshisi: aldyńǵy sińir erneýin qalpyna keltirýge baǵyttalǵan Bankart otasy. Ekinshisi: ıyq býynynyń artqy bóligin bekitýge arnalǵan remplıssaj dep atalatyn operasıa. Operasıalar MÁMS qarajaty esebinen jasaldy. Aýrýhanadan shyqqan soń pasıent 6 aıǵa deıin reabılıtasıadan ótýi tıis.
Buryn mundaı otalar úlken tilik arqyly, ashyq ádispen jasalatyn. Saldarynan asqyný qaýpi artyp, qalpyna keltirý merzimi de uzaratyn, bul jolǵy operasıanyń biregeıligi de osynda, deıdi maman.
Qazirgi zamanǵy artroskopıa ota barysynda bolatyn zaqymdaný men ınfeksıanyń aldyn alýǵa, ońaltý prosesin tezdetýge múmkindik beredi. Sebebi qoldanylatyn beınekameralar dáldikti arttyrady, al, ózdiginen ydyraıtyn bıoımplant ýaqyt óte kele súıek tinimen aralasyp ketedi. Iaǵnı, qaıta ota jasaýdy qajet etpeıdi.
«Ota kishigirim tesikter arqyly jasaldy. Biraq nátıjesi ashyq operasıadan kem emes jáne munda naýqas ómirine, densaýlyǵyna tónetin qaýip edáýir azaıady. Zamanaýı bekitkishter men ımplanttar otanyń qaýipsizdigi men tıimdiligin arttyrady», – deıdi Arnat Baızaqov.