Almaty qalasyndaǵy Nazarbaev zıatkerlik mektebiniń eki komandasy NASA jáne AQSH Ulttyq ǵarysh qoǵamy (National Space Society) uıymdastyrǵan Space Settlement Contest 2025 halyqaralyq baıqaýynda jeńimpaz atandy.
Baıqaýǵa álemniń 25 elinen 26 myńnan astam oqýshy qatysty, dep habarlaıdy aqshamnews.kz.
«YURT» jobasyn usynǵan komandanyń quramynda almatylyq oqýshylar Anastasıa Soı, Iýlıa Kım, Kamıla Ertisqyzy jáne İlıas Dáýlet bar. Olar birinshi oryndy ıelendi. Komanda Iýpıterdiń orbıtasymen qozǵalyp, onyń Ganımed jáne Kallısto serikterine jaqyndaı alatyn avtonomdy ǵarysh stansıasynyń jobasyn tanystyrdy.
Stansıa 30 myńǵa jýyq adam turýǵa arnalǵan, jasandy gravıtasıa júıesimen jáne tolyqtaı derbes tirshilikpen qamtamasyz etý júıesimen jabdyqtalǵan.
Ekinshi oryndy taǵy bir qazaqstandyq komandanyń «Ikarýs» jobasy ıelendi. 45 myń turǵynǵa arnalǵan Ganımedtiń tómengi orbıtasynda ornalasqan ǵarysh stansıasyn qurastyrýshylar - Tabyldy Asan, Temirbýlatov Arman, İnkárbek Sabyrjan, Quzbakova Tomırıs, Japarov Muhıdın,
Álisher Baǵdáýlet, Berik Ýálı, Nursultan Aısulý, Taırov Arlan, Baqyt Aslan. Jetekshileri — 12 synyp oqýshysy Ádilet Sandyqbaev.
Space Settlement Contest — mektep oqýshylaryna arnalǵan halyqaralyq jyl saıyn ótkiziletin baıqaý. Ol oqýshylardyń ınjenerlik oılaý qabiletin, kreatıvtiligin jáne ǵylymǵa umtylysyn damytýǵa baǵyttalǵan.