Almaty qalasy Jastar saıasaty basqarmasynyń qoldaýymen «Dúısenbilik sport» jobasy sheńberinde «Social project management» ortalyǵy» qoǵamdyq qorynyń uıymdastyrýymen NEET sanatyndaǵy jastar arasynda ústel tenısinen týrnır ótti.
Buqaralyq sportty damytý jáne jastardy qoldaý maqsatyndaǵy atalmysh is-sharaǵa bazarda, saýda ortalyqtarynda jumys isteıtin jáne jumyssyz júrgen 30 jas baq synady.
Buǵan deıin «Dúısenbilik sport» jobasy aıasynda almatylyq bazar jastarynyń arasynda shaǵyn fýtboldan týrnır ótken bolatyn. Saıysqa túskender arasynda bolashaqta úlken dodalarda top jarýdy maqsat etkender de bar.
Týrnır Almaty qalasy Alataý aýdanyndaǵy ADD ústel tenısi ortalyǵynda ótti. Atalmysh is-sharaǵa «Qazyna», «Arystan», «Arlan», «Salamat», «Tıgrahaýd» t.b saýda ortalyqtarynda jumys isteıtin jigitter men jumyssyz jastar qatysty.
Alǵashqy irikteý kezinde eki topqa bólinip, ózara irikteý oıyndaryn ótkizdi. Shırek fınal men jartylaı fınaldyq saıysqa súrinbeı jetken jastar arasyndaǵy oıyn tartysty ótti. Jarys qorytyndysynda 1-oryndy «Arystan» bazarynyń ústel tenısshileri ıelenip, 250 myń teńgeniń sertıfıkatyn qanjyǵasyna baılady. Al 2-oryn alǵan «Tıgrahaýd» bazarynyń jastary 150 myń teńgeniń sertıfıkatyn oljalady. Úshinshi oryndy «Jańa Ialán», «Saryarqa» bazarynyń oıynshylary ózara bólisip, árqaısysy 50 myń teńgeniń sertıfıkatyn enshiledi.
Endi aldaǵy ýaqytta «Dúısenbilik sport» jobasy aıasynda NEET sanatyndaǵy jastar arasynda basketboldan, voleıboldan keminde 16 komandanyń, al kıbersport boıynsha 30 oıynshynyń qatysýymen týrnır uıymdastyrylmaq.
Jeńimpazdarǵa aqshalaı sertıfıkattar men medal, kýboktardy ústel tenısinen halyqaralyq sport sheberi Igor Medvedev tabys etti. Týrnırge belgili sport sheberi Alekseı Tımchenko tórelik jasady.