Almaty ákimi Darhan Satybaldy jumys sapary barysynda Alataý aýdanyndaǵy birqatar nysandy aralap, «Batys» polıortalyǵyn damytý jaıyn talqylady.
Qalanyń 2040 jylǵa deıingi Bas josparynda monoortalyqty damýdan kóportalyqty úlgige kóshý kózdelgen. Qaladaǵy iskerlik belsendilikti qaıta bólýge, ortalyq aýdandardaǵy júktemeni azaıtýǵa jáne jańa ósý núktelerin qalyptastyrýǵa baǵyttalǵan polıortalyqtardyń biri Alataý aýdanynda ornalasady.
200 gektar aýmaqtaǵy «Batys» polıortalyǵy aıasynda 9 jańa balabaqsha, 6 mektep, sport keshenderi, 70 gektarlyq rekreasıalyq aımaq pen saıabaq, 920 myń sharshy metr komersıalyq alań jáne zamanaýı turǵyn úı qurylysy josparlanǵan.
«Jobany biryńǵaı sáýlettik tujyrymdamaǵa sáıkes jetildirý qajet. Jobalaýshylardyń óz múddesi bar, olar kóbirek turǵyn úı salǵysy keledi. Bizdiń mindetimiz – tepe-teńdikti saqtaı otyryp, turǵyn úıdiń tyǵyzdyǵyn azaıtý, polıortalyq ıadrolarynyń júrginshiler baılanysyn qamtamasyz etý. Munda qonaqúıler, iskerlik ortalyqtar, áleýmettik nysandar bolýy tıis. Sonda aýdan tartymdy bolady», – dep atap ótti Almaty ákimi Darhan Satybaldy.
Sonymen qatar qala basshysy Zerdeli shaǵynaýdanynda 550 orynǵa arnalǵan mektep qurylysymen tanysty. Jobaǵa sáıkes asqanasy, sport zaly, oqý synyptary, zerthanalyq jáne mýltımedıalyq kabınetteri bar 3 qabatty ǵımarat qarastyrylǵan.
Mektep qurylysy 2024 jyldyń shildesinde bastalǵan. Alaıda merdiger kompanıa kelisimshartty oryndamaǵandyqtan, sot sheshimimen adal emes dep tanyldy. Osydan keıin Qurylys basqarmasy jańa merdigerdi anyqtap, búginde nysanda jumystar qarqyndy júrip jatyr. Syrtqy jáne ishki qabyrǵalar turǵyzylyp, shatyr ornatylýda, ishki árleý jumystary bastalǵan. Qosymsha ınjenerlik jeli tartylýda.
Darhan Satybaldy jumysty jedeldetip, mektep qurylysyn jyl sońyna deıin aıaqtaýdy tapsyrdy. Ákim materıaldardyń sapasyna jáne bilim ordasyn zamanaýı jabdyqtaýǵa erekshe nazar aýdarýdy mindettedi.