Almaty ákimi Darhan Satybaldy jumys sapary barysynda Naýryzbaı aýdanyndaǵy «Alma Sıtı-5» turǵyn úı kesheniniń turǵyndarymen kezdesti. Áńgime barysynda olar ınjenerlik jáne áleýmettik ınfraqurylymǵa qatysty máselelerdi kóterdi.
2020-2021 jyldary «Nurly jer» memlekettik baǵdarlamasy aıasynda bul keshende 127 kópqabatty úı salyndy. Alaıda elektr jelileri áli kúnge deıin qyzmet kórsetýshi uıymdardyń balansyna berilmegen. Sonyń saldarynan 2025 jyldyń basynan beri 30-dan astam apat bolyp, jıi aqaýlar oryn alǵan. Bul apattar sý sorǵy qondyrǵylarynyń jumysyna da kedergi keltirip otyr.
«Men energetıka jáne sýmen jabdyqtaý basqarmalaryna, sondaı-aq qurylys basqarmasyna jelilerdi úsh jyl merzimge tolyqqandy qyzmet kórsetý úshin «Alataý Jaryq Kompanıasy» AQ balansyna berýdi tapsyrdym. Bul úderisti jedeldetý qajet», – dedi Almaty ákimi. Bul máseleni bıylǵy qyrkúıekte sheshý josparlanyp otyr. Sonymen qatar árbir eseptegish quralyn tekserýdi qosa alǵanda, keshendi tekserý júrgiziledi.
Turǵyndar áleýmettik ınfraqurylymnyń da jaıyn aıtty. Bıyl bes jańa mektep pen úsh balabaqsha ashý kózdelgen. Jaqyn kúnderi №202 balabaqsha paıdalanýǵa beriledi. Buǵan qosa, Naýryzbaı aýdanynda erekshe qajettiligi bar balalarǵa arnalǵan túzetý ortalyǵy jáne basqa da áleýmettik nysandar salý josparda bar.
Kezdesý barysynda polısıanyń tirek pýnktin ornatý jáne ýchaskelik ınspektorlar sanyn arttyrý jóninde de usynys aıtyldy. Ákim polısıa departamentine keshen aýmaǵynda tirek pýnktin ashý múmkindigin qarastyrýdy tapsyrdy.