"Aýyl" partıasy Ortalyq apparaty men Almaty qalalyq fılıalynyń uıymdastyrýymen Qurmanǵazy atyndaǵy Qazaq ulttyq konservatorıasynda "Ulttyq mýzyka murasy Aleksandr Zataevıch zertteýlerinde" atty tanymdyq dáris-konsert ótti. İs-sharanyń maqsaty – qazaq halqynyń ulttyq mýzyka murasyn dáripteý, ult rýhanıatynyń damýyna úles qosqan tulǵalardyń eńbegin jastarǵa keńinen tanystyrý jáne mýzykalyq óner arqyly patrıottyq sezimdi qalyptastyrý boldy.
Sharaǵa mádenıet pen óner salasynyń ókilderi, joǵary oqý oryndarynyń stýdentteri, profesor-oqytýshylar quramy jáne partıa músheleri qatysty. Kesh barysynda "Aýyl" partıasy tóraǵasynyń orynbasary Qýanysh Qabykenuly Seıtjanov quttyqtaý sóz sóılep, Aleksandr Zataevıchtiń eńbekteriniń qazaq mádenıeti úshin mańyzdylyǵyna toqtaldy. Ol óz sózinde Zataevıchtiń qazaq halqynyń baı mýzykalyq murasyn jınaqtap, álemge tanytýda erekshe eńbek sińirgenin atap ótti. Sondaı-aq, partıanyń mádenı baǵyttaǵy bastamalary men ulttyq qundylyqtardy saqtaý, jastardyń rýhanı damýyna jaǵdaı jasaý baǵytyndaǵy jumystarymen bólisti.
Varshava ýnıversıtetiniń doktoranty, qazaq-polák baılanystaryn zertteýshi, mýzyka zertteýshisi Karınbaev Jandos Áýelbekuly Aleksandr Zataevıchtiń qazaq halqynyń fólkloryn zertteý barysynda jınaǵan materıaldary, olardyń tarıhı, etnografıalyq jáne mýzykalyq qundylyǵy jaıynda dáris júrgizdi. Sonymen qatar, Zataevıch eńbekteriniń Polsha men Qazaqstan arasyndaǵy mádenı baılanystardy nyǵaıtýdaǵy rólin de erekshe atap ótti.
Kesh barysynda Qurmanǵazy atyndaǵy Qazaq ulttyq konservatorıasynyń stýdentteri halyq kúılerin oryndap, dástúrli ánder shyrqady. Tyńdarmandar qazaq mýzykasynyń baılyǵy men tereńdigin taǵy bir márte sezindi. Konsert barysynda Dáýletkereı, Táttimbet, Qurmanǵazy sıaqty uly kúıshilerdiń shyǵarmalary oryndalyp, ulttyq ónerdiń máńgilik qundylyq ekeni aıqyndaldy.
İs-shara sońynda qatysýshylar ulttyq mádenıetti dáripteý men tarıhı tulǵalardyń eńbegin ulyqtaý baǵytyndaǵy osyndaı tanymdyq jobalardyń mańyzdylyǵyn atap ótti. "Aýyl" partıasy ókilderi aldaǵy ýaqytta da mádenıet pen rýhanıat salasyndaǵy bastamalardy qoldap, eldiń mádenı damýyna serpin beretin sharalardy turaqty túrde ótkizýdi jalǵastyratyndaryn jetkizdi.
"Ulttyq mýzyka murasy Aleksandr Zataevıch zertteýlerinde" atty dáris-konsert qazaq mádenıetiniń baı murasyn nasıhattaýǵa, jastardyń ulttyq sana-sezimin arttyrýǵa jáne halyq mýzykasyna degen qurmetti kúsheıtýge baǵyttalǵan taǵylymdy ári áserli shara boldy.