Búgin BAQ ókilderine Úlken Almaty ózeniniń arnasyn qaıta jańǵyrtý jobasy tanystyryldy. Jýrnalıserge jobanyń oryndalý barysy kórsetilip, suraqtaryna jaýap berdi.
Qalalyq ekologıa jáne qorshaǵan orta basqarmasynyń málimetinshe, qaıta jańǵyrtý 5,7 shaqyrymdyq aýmaqta – №1 tundyrǵyshtan bastap Abaı dańǵylyna deıingi bólikte júrgizilip jatyr. Joba aıasynda irgeles aýmaqty abattandyrý kózdelgen. Qazirgi tańda jumystardyń 40%-dan astamy oryndaldy. Basqarma mamandary nysannyń jaı-kúıin kúndelikti baqylap otyr. Sonymen qatar, tehnıkalyq qadaǵalaý jáne memlekettik sáýlet-qurylys baqylaýy tarapynan turaqty baqylaý júrgiziledi.
Jobanyń merdigeri – «Pavlodar ózen porty» AQ. Kompanıa ókili Sergeı Jıtınevtiń aıtýynsha, qaıta jańǵyrtý josparǵa saı júrip jatyr, jobany aıaqtaý 2026 jylǵa josparlanǵan.
Jumys aıasynda eski ári deformasıalanǵan granıt taqtalary alynyp, gıdrooqshaýlaǵysh qabaty bar jańa taqtalar ornatylady. Jıektastar jańaryp,júrginshi jáne tehnıkalyq joldar abattandyrylady. Gıdravlıkalyq synaqtardan keıin anyqtalǵan aqaýlar joıylyp, tegisteý qabaty tóseledi.
Sondaı-aq, jasyl jelekti avtosýarý úshin sorǵy stansıasy ornatylady. Ózen boıyna aǵashtardy jappaı egý 2026 jyly kóktemge josparlanǵan. Jobaǵa jaramsyz qorshaýlardy alyp tastaý jáne jańartý, sondaı-aq kópirlerdi jóndeý jumystary – tazalaý, grýnttaý jáne boıaý kiredi.
«Barlyq jumys josparǵa sáıkes oryndalyp jatyr. Qajet bolǵan jaǵdaıda, turǵyndardyń ótinishi boıynsha qosymsha túsý jáne kóterilý joldaryn qarastyrýǵa daıynbyz», – dedi merdiger uıym ókili.