Sáýlet jáne qala qurylysy basqarmasynyń jáne «QTK» AQ turǵyn úı portalynyń derekteri boıynsha, qala aýmaǵyndaǵy 28 turǵyn úı qurylysy nysanyna úleskerlerdiń qarajatyn tartýǵa ruqsat berilgen.
Eske sala keteıik, 2025 jyly maýsymda «Turǵyn úı qurylysyna úlestik qatysý týraly» Qazaqstan Respýblıkasynyń Zańyna ózgerister engizildi.
Zań boıynsha myna jaǵdaıda kóppáterli jáne jeke turǵyn úılerdi jarnamalaýǵa tikeleı tyıym salynady:
• eger qurylys salýshyda úleskerlerdiń qarajatyn tartýǵa ruqsaty joq bolsa;
• Biregeı operatordyń kepildik sharty jasalmasa;
• bank arqyly jobalyq qarjylandyrý júzege aspasa.
Sondaı-aq, buǵan deıin jobalyq-smetalyq qujattamanyń negizinde jarnama ornalastyrýǵa múmkindik bergen norma alynyp tastaldy. Bul buryn bolǵan quqyqtyq olqylyqtyń jolyn kesti.
Budan bólek, zańnamaǵa «jeke turǵyn úıler kesheni» degen jańa uǵym engizildi. Endi mundaı nysandar da «Turǵyn úı qurylysyna úlestik qatysý týraly» Zań talaptaryna baǵynady.
Úleskerlerdiń qarajatyn tartýǵa ruqsat pen ózge de ruqsat qujattarynyń bar-joǵyn tekserý úshin azamattar myna baılanystarǵa júgine alady:
* Qurylysqa qatysty ruqsat qujattary boıynsha – Qala qurylysyn baqylaý basqarmasynyń anyqtamalyq Call-ortalyǵy:
+7 (705) 896-6000
* Úleskerlerdiń qarajatyn tartýǵa ruqsat boıynsha – Sáýlet jáne qala qurylysy basqarmasy:
+7 (727) 2408000
* «QTK» AQ turǵyn úı portaly – homeportal.kz
Qala qurylysyn baqylaý basqarmasy azamattarǵa alǵashqy naryqtaǵy kúmándi mámileden saqtaný úshin baspana satyp almas buryn qurylys salýshynyń ruqsat qujattaryn muqıat tekserýge keńes beredi.