8 jeltoqsanda Jenevada ótken Halyqaralyq kóshi-qon uıymy (HKU) keńesiniń jyl saıynǵy sesıasynda Birikken Ulttar Uıymynyń bul qurylymy qazaqstandyq ánshi ári gýmanıtarlyq qyzmetpen aınalysyp júrgen Dımash Qudaıbergendi jahandyq izgi nıet elshisi etip taǵaıyndady, dep habarlaıdy Aqshamnews.kz tilshisi Dimashnews-ke silteme jasap.
Dimashnews málimetinshe, bul taǵaıyndaý onyń uıymmen kópjyldyq yntymaqtastyǵynyń jalǵasy. Byltyr Dımash óńirlik izgi nıet elshisi atanyp, mıgrasıa, adam saýdasy jáne osal toptardyń máselelerin kóterýge baǵyttalǵan gýmanıtarlyq kampanıalarǵa belsendi qatysty. Sondaı-aq BUU Bas hatshysy Antonıý Gýterrısh Qazaqstanǵa kelgen kezde óner arqyly gýmanıtarlyq bastamalardy ilgeriletý ıdeıasyn usynǵan edi.
Bıyl ol HKU-men yntymaqtastyǵyn keńeıtip, Ramazan aıyndaǵy qaıyrymdylyq aksıalaryna qosyldy jáne adam saýdasyna qarsy bastamalardy qoldady. Álemdik Stranger týry barysynda Nú-Iork, Mehıko, Barselona, London jáne Berlın qalalarynda ınklúzıvtilik pen birlik týraly oılaryn kópshilikke jetkizip, HKU mısıasynyń tanylýyna úles qosty.
8 jeltoqsandaǵy keńes otyrysynda Dımash BUU múshe memleketteriniń delegasıalary aldynda S.O.S d’un terrien en détresse kompozısıasyn oryndady. HKU bas dırektory Emı Poýp ártistiń gýmanıtarlyq bastamalarǵa qosqan úlesin erekshe atap ótti.