Tintý kezinde sýsabynnyń ydysyna salynǵan ótkir ıisti untaq tabyldy.
Almaty qalasy QAJD №72 mekemesi jedel bólimi qyzmetkerleriniń aqparaty boıynsha, jýyrda atalǵan mekemege esirtki zattaryn ótkizbekshi bolǵan úsh adam ustaldy, dep habarlaıdy Almaty-akshamy.kz Polisia.kz-ke silteme jasap.
Jedel aqparat boıynsha, shuǵyl áreket etken mekemeniń jedel ýákilderi Almaty qalasy, Túrksib aýdany polısıa basqarmasynyń jedel qyzmetkerlerimen birge tergeý ızolátorynyń aýmaǵyna kelgen kók tústi Subaru Forester jeńil kóligin toqtatqan bolatyn.
Ustalǵan 19 jastaǵy eki jigit jáne 37 jastaǵy er adam ózderiniń mekemege esirtki zatyn kirgizý múmkindigin izdep kelgenderin moıyndady. Sondaı-aq abaqtyǵa telefon tasyǵan áıeldiń de áreketi anyqtaldy. Bas bostandyǵynan aıyrý oryndaryndaǵy jazalylar men kúdiktilerge sálemdeme ákelýshiler úshin baqylaý-tekserý pýnktinde arnaıy eskertý jazba ilinip turady.
Iaǵnı, QR Ákimshilik quqyqbuzýshylyq týraly kodekstiń 481-baby 1-bóliginde kózdelgendeı, Qylmystyq-atqarý júıesiniń mekemelerinde ustalatyn adamdarǵa tyıym salynǵan zattardy ótkizý úshin jasalǵan áreketterge qoldanylatyn jaza bary aýyzsha da eskertiledi.
Alaıda osyndaı eskertýlerge qaramastan, tyıym salynǵan zattardy ótkizýge tyrysatyndar jıi anyqtalady. Sonyń biri – Almaty qalasyndaǵy tergeý ızolátorynda jatqan balasyna jasyryn túrde telefon bermekshi bolǵan ananyń áreketi. Ol alaıaqtyq jasaǵany úshin Qylmystyq kodekstiń 190-baby boıynsha kúdikti dep tanylyp, tergeý abaqtysyna qamalǵan balasyna ákelgen kúrteniń qaltasyna Tehet telefony men SIM karta jasyrǵan.