Almatyda «Taza Qazaqstan» aksıasy aıasynda 9 myń tonnadan astam qoqys jınalyp, 19 myńnan asa aǵash otyrǵyzyldy
Almaty qalasynda kóktem boıy jalǵasqan «Taza Qazaqstan» ekologıalyq aksıasy tabıǵatty qorǵaýǵa jáne qalany kórkeıtýge baǵyttalǵan iri qoǵamdyq bastamaǵa aınaldy. Bul týraly Aqshamnews.kz saıty habarlaıdy.
Naýqan aıasynda qala boıynsha 9363 tonna qoqys jınalyp, 19 275 túp aǵash otyrǵyzyldy. Barlyq segiz aýdandy qamtyǵan 15 sharaǵa 115 665 adam qatysyp, tabıǵatqa janashyrlyq tanytty.
Eń iri sharalardyń biri – «Taza qala» aksıasy 15–29 naýryz aralyǵynda ótti. Bul kezeńde 25 600-den astam turǵyn, onyń ishinde depýtattar, sportshylar, óner qaıratkerleri jáne komýnaldyq qyzmet ókilderi belsendi atsalysty.
Qala parkteri, skverler, aýlalar men qoǵamdyq aýmaqtar 170-ke jýyq arnaıy tehnıkamen tazartyldy. Aksıa aıasynda alma, úıeńki, sheten, akasıa sekildi aǵash túrlerinen 5000-nan astam kóshet otyrǵyzyldy.
27 naýryzda ótken «Taza kásip – taza aımaq» aksıasy barysynda 1600-den astam adam, sonyń ishinde bıznes ıeleri, eriktiler jáne jergilikti turǵyndar kásipkerlik nysandarynyń aınalasyn, trotýarlardy, aryqtar men gúlzarlardy tazalady.
Shara qorytyndysy boıynsha 2393,25 tonna qoqys shyǵaryldy. Bul baǵytta Jetisý, Medeý jáne Almaly aýdandarynyń kásipkerleri belsendiligimen erekshelendi.
Naýqan barysynda ekologıalyq aǵartýǵa erekshe nazar aýdaryldy. «Tabıǵat – bizdiń qolymyzda» uranymen ótken eko-saǵattarǵa 35 joǵary oqý ornynan 47 530 stýdent qatysty.
Al mektep oqýshylary arasynda «Meniń ekologıaǵa qosqan úlesim» atty shyǵarma baıqaýy ótip, 22 mektepten oqýshylar qatysty. Eń úzdik 6 joba marapatqa usynyldy.
Sondaı-aq, «Túlekterdiń aǵash egýi» ekochellendji barysynda 216 mekteptiń 12 myń túlegi 7285 aǵash otyrǵyzdy. Bul joba túlekterdiń týǵan qalasyna degen janashyrlyǵyn kórsetýdiń jarqyn mysalyna aınaldy.
-
5 sáýirde «Taza jaǵalaý» aksıasy barysynda Esentaı ózeni boıy men Kereı-Jánibek kóshesi mańyndaǵy aýmaqtar tazartylyp, 5000 tonnadan astam qoqys jınaldy.
-
22 naýryzda «Jer saǵaty» aıasynda qalanyń 43 saýda-oıyn-saýyq ortalyǵynda jáne 100-den astam kafe men meıramhanalarda jaryq 1 saǵatqa sóndirilip, energıa únemdeýdiń mańyzdylyǵy dáripteldi.
-
PowerTech EXPO aıasynda «Qaldyqsyz bolashaq» kórmesinde 100 joba usynylyp, 2000 adam qatysty.
-
13 mamyrda bastalǵan «Taza aýla – taza qala» baıqaýy úzdik úıler men aýlalardy anyqtap, turǵyndardy ortaq jaýapkershilikke yntalandyrdy. Qorytyndysy mamyrdyń sońynda shyǵaryldy.
«Taza Qazaqstan» ekologıalyq aksıasy Almaty turǵyndarynyń tabıǵatqa janashyr kózqarasyn, ortaq iske birige alatynyn kórsetti. Bul bastama tek senbilikpen shektelmeı, ekologıalyq mádenıet qalyptastyrýǵa baǵyttalǵan júıeli qozǵalysqa aınalyp otyr.
Nurjan Býlekbaevtyń aıtýynsha, bul bastamalar – jasyl ári taza bolashaqqa jasalǵan alǵashqy naqty qadamdar. Ekologıany saqtaý – barsha azamattyń ortaq mindeti. Al Almaty qalasy osy baǵytta aldyńǵy qatarda keledi.