QR BǴM júrgizgen qaıta tekserý jumystarynyń nátıjesinde qalamyzda ornalasqan Shet tilder jáne iskerlik karera ýnıversıteti lısenzıasynan aıyrylý aldynda tur.
Bilim jáne ǵylym salasyndaǵy sapany qamtamasyz etý komıteti Shet tilder jáne iskerlik karera ýnıversıteti lısenzıasynyń qoldanylýyn toqtatty, dep habarlaıdy Almaty-akshamy.kz QR BǴM baspasóz qyzmetine silteme jasap.
«Biz elimizde bilim berý sapasy men kadrlar daıarlaýdy jaqsartý úshin joǵary oqý oryndarynda tekserýler júrgizemiz. Eger ýnıversıtetter qajetti talaptarǵa saı bolmasa, onda erteń bilimi men biliktiligi tómen, eńbek naryǵyna jumys berýshilerdiń suranystaryna sáıkes kelmeıtin mamandar shyǵady. Bul rette joǵary oqý oryndaryna buzýshylyqtardy joıýǵa ýaqyt beremiz, alaıda olar kemshiliktermen jumys júrgizbeıdi. Osyǵan baılanysty keıinirek qatań sharalar qoldanýǵa týra keledi. Ýnıversıtetterdiń oqý jaǵdaılaryn, bilim berý baǵdarlamalaryn jáne tutastaı alǵanda, stýdentterdi belgili bir mamandyqtarǵa oqytýǵa degen kózqarasyn jaqsartýy úshin bul óte mańyzdy. Áıtpese, joǵary oqý oryndary sapaly bilim emes, tek dıplomdar beretin bolady. Mysaly, Shet tilder jáne iskerlik karera ýnıversıtetinde bilim berý sapasyn qamtamasyz etýdiń ishki júıesi qalyptaspaǵan. Bilim berý baǵdarlamalaryn, jeke oqý josparlaryn taldaý belgili bir pánder boıynsha kredıtterdi ıgerýde úlken aıyrmashylyqtardy kórsetti. Tıisinshe, bilim alýshylar pánderdi tolyq kólemde meńgermeıdi. Oqytý nátıjeleri boıynsha stýdentterdiń 90%-y shekti deńgeıden óte almady. Oqý prosesinde tipti eń tómengi belgilengen talaptarǵa sáıkes kelmeıtin eskirgen kompúterler qoldanylady. Beıindik magıstratýra túlegine ǵylymı-pedagogıkalyq baǵyttaǵy magıstr dárejesin berý boıynsha buzýshylyqtar da anyqtaldy. Memlekettik atestattaý komısıasynyń sheshimimen bir jyldyq magıstratýra túlegine eki jyldyq magıstr dárejesi berildi. Bular joǵary oqý ornynda anyqtalǵan buzýshylyqtardyń az ǵana bóligi», – dep atap ótti QR BǴM Bilim jáne ǵylym salasyndaǵy sapany qamtamasyz etý komıtetiniń basqarma basshysy Elvıra Saparbekova.
Budan ári bas lısenzıadan aıyrý jáne joǵary oqý ornyn jabý boıynsha jumys júrgiziletin bolady. Zańnamaǵa sáıkes, lısenzıanyń qoldanylýy toqtatyla turǵan jaǵdaıda stýdentter ýnıversıtettiń anyqtalǵan buzýshylyqtardy joıýyn kútpeı-aq, basqa joǵary oqý oryndaryna aýysa alady.