Tokıo Olımpıadasynyń kórermensiz ótetinin budan buryn habarlaǵanbyz, tipti japonıalyqtar da oıyndardy óz kózimen kóre almaıtyn boldy.
XXXII jazǵy Olımpıada oıyndary Tokıoda 23 shildede bastalady. Qazaqstan quramasy 27 sport túrinen 97 lısenzıany jeńip aldy, dep habarlaıdy Almaty-akshamy.kz
Dúnıe júzinde qalyptasqan epıdahýaldyń nasharlaýyna baılanysty búkil álem halqy Olımpıadany onlaın-translásıalardan kóredi. Biraq bıyl Olımpıada oıyndarynyń translásıasy qazaqstandyq telearnalardan kórsetilmeıtin boldy.
«Tokıodaǵy Olımpıada oıyndarynyń tikeleı efır quqyǵy Dentsu Inc. kompanıasyna tıesili. Qazaqstan, Qazsport jáne «Habar» respýblıkalyq telearnalary Dentsu Inc. kompanıasymen 2019 jyldan beri kelissózder júrgizýge tyrysqan. Alaıda uzaqqa sozylǵan kelissózderge qaramastan, eki tarap kelisimge kele almady. Quqyq ıesi oıyndardy translásıalaýǵa lısenzıanyń baǵasyn 2016 jáne 2018 jyldardaǵy baǵamen salystyrǵanda 123%-ǵa artyq belgilegen», – delingen «Qazaqstan» TRK AQ baspasóz qyzmetiniń habarlamasynda.
Bul aqparatty Almaty qalasy dene shynyqtyrý jáne sport basqarmasynyń baspasóz qyzmetiniń basshysy Danıar Kárimjan óziniń FB paraqshasynda jarıalaǵan.