Medısına qyzmetkerine premıa tabystaldy.
Qazannyń 19 kúni Qazaq taǵamtaný akademıasynyń Prezıdenti Tóregeldi Sharmanov 92 jasqa toldy, dep habarlaıdy Almaty-akshamy.kz Almaty.tv silteme jasap.
Memleket jáne qoǵam qaıratkerin quttyqtaýǵa Almaty qalasy ákiminiń atynan orynbasary Ásem Núsipova arnaıy bardy. Jınalǵandar akademıktiń densaýlyq saqtaý salasynyń damýyna qosqan úlesi zor ekenin aıtty. Tyń ǵylymı jańalyqtardyń jarshysy, elimizge erekshe eńbegi sińgen memleket qaıratkerin quttyqtaýǵa zıaly qaýym ókilderi, medısına salasynyń úzdikteri jınaldy.
«Tóregeldi Sharmanov aǵamyz – ómirge degen qushtarlyqty adamnyń densaýlyǵyn qýatty etý arqyly ulttyń sapasyn kóterýge orasan eńbek sińirip júrgen tulǵa», – dedi «Tóregeldi Sharmanov Halyqaralyq qory» qamqorshylyq keńesiniń tóraǵasy Qýanysh Sultanov.
Tóregeldi Sharmanovtyń halyqaralyq qory byltyr qurylǵan bolatyn. Quramynda qazaqtyń betkeustarlary Oljas Súleımenov, Asanáli Áshimov jáne Murat Áýezov bar. Búgin qor qyzmeti aıasynda eńbegi kópke tıgen medısına qyzmetkerine premıa tabystaldy. Mundaǵy maqsat – tyń jańalyq ashqan jas ǵalymdar men dárigerlerdi qoldaý. Bolashaqta qordyń jumysyn jandandyrý kózdelip otyr.
«Meniń olardyń aldyna qoıatynym buryn-sońdy bolmaǵan jańa tásildermen emdep, ony dáleldep, anyqtalǵanyna baılanysty laýreat ataǵy beriledi. Byltyr koronovırýsqa qarsy keremet protokol jasaǵan adamdar aldy. Syrt memleketten - 2 adam, ózimizden - 2 adam. Bıyl da sondaı adamdardy tańdap, meniń týǵan kúnimde sol premıany tabys etemin», – dedi Qazaq taǵamtaný akademıasynyń prezıdenti Tóregeldi Sharmanov.
