S.J.Asfendıarov atyndaǵy QazUMÝ-de óteýsiz qan tapsyrý aksıasy ótkizildi, bul qaıyrymdylyq sharasyna 80 stýdent qatysty, dep habarlaıdy Almaty-akshamy.kz.
Aksıa kómekti qajet etetin naýqas balalarǵa qoldaý kórsetý aıasynda uıymdastyryldy, - deıdi Almaty qalalyq qoǵamdyq densaýlyq saqtaý basqarmasynyń «Qalalyq qan ortalyǵynyń »dırektory Jandos Nádirov.
«Muqtaj jandarǵa erikti túrde kómektesýge daıyn ekenin kórsetken aksıanyń barlyq qatysýshylaryna shyn júrekten alǵys bildiremiz. Osyndaı sátter bizdiń qoǵamda ıgi isterdi atqarýǵa, ózgege kómektesýge daıyn janashyr jandardyń bar ekenin kórsetedi», - dep atap ótti ol óz sózinde.
Donor bolýǵa nıet bildirgen 80 stýdenttiń 52-sine qan tapsyrýǵa ruqsat berildi.
Bul donorlyq proseske degen baısaldy kózqarasty jáne árbir qatysýshynyń jaýapkershiligin kórsetedi.
Aksıa nátıjesinde 26,52 lıtr qan jınaldy, bul kómekke muqtaj jandar úshin keremet qundy resýrs bolary sózsiz.
Mundaı sharalar naýqas adamdardyń ómirin saqtap qalýmen qatar, qoǵamda donorlyq mádenıettiń qalyptasýyna da septigin tıgizedi.
Osyndaı is-sharalar bizge yntymaq pen ózara kómektiń mańyzdylyǵyn eske salady, sonymen qatar árqaısymyzdyń qaıyrymdylyq isterge úles qosa alatynymyzdy kórsetedi.
«Biz sharaǵa qatysýshylardyń barlyǵyna úlken alǵysymyzdy bildiremiz jáne búgin bastaý alǵan áripestigimiz áli de jalǵasyn tabady dep senemiz. Árqaısymyz muqtaj jandarǵa kómek qolyn sozýǵa daıyn bolaıyq jáne álemdi jaqsyraq ári meıirimdi etý úshin ıgi ister atqaraıyq», - dep túıindedi sózin Jandos Nádirov.
Esterińizge sala keteıik:
- Jasy on segizge tolǵan, arnaıy medısınalyq tekserilýlerden ótken, qan tapsyrýǵa qarsy kórsetkishi joq jáne qan jáne onyń komponentterin medısınalyq maqsatta erikti túrde tapsyratyn jeke tulǵalar donor bola alady.
- QR Densaýlyq saqtaý mınıstrliginiń buıryǵyna sáıkes donorlardy qabyldaý tek QR azamatynyń jeke kýáligi, QR tól qujaty (túp nusqasy) nemese elektrondyq nusqasy bar bolǵanda ǵana iske asyrylady. Sheteldik azamattar sheteldik tólqujat pen QR JSN kórsetýi kerek.
- Donordyń boıy 150 sm –den, salmaǵy 50kg joǵary bolý kerek.
-Donorlyqqa baratyn kúnniń qarsańynda donorlarǵa keshkisin maıly, qýyrylǵan, ashshy taǵamdar, sút ónimderin, spırttik ishimdikter ishýge bolmaıdy. Spırt ishimdikterin ishkennen keıin 48 saǵat ótý kerek, sońǵy 3 kúnde dári qabyldaýǵa bolmaıdy.
- Qan tapsyrar kúni tańerteń jeńil tamaqpen qanaǵattanyńyz jáı qantpen qara sháı ishińiz. Qan tapsyrar aldynda kofe ishýge bolmaıdy. Eger donor tamaq ishse ol qan alýǵa tek 4-6 saǵat ótkennen keıin jiberilýi tıis.
- Denelerine áshekeı sýret salǵandar, pırsıng jasaǵandar, ınemen emdelgender, erin, qasyna túzetý engizgender osy áreketter aıaqtalǵannan bastap, 4 aıǵa deıin donorlyqqa jiberilmeıdi.
- Túngi aýysymdaǵy jumystan soń qan berýge bolmaıdy.
- Áıelderdiń etekkiri kelip ketkennen soń 5 kúnnen keıin ǵana donor bola alady.
- Gepatıtpen, VICH, týberkýlezben , jynystyq jolmen beriletin ınfeksıamen qaterli isikpen aýyrǵandar, múgedektik top berilgen azamattar t.b – donor bola almaıdy.